@7 sī anupadavaṇṇanā 8 cha.Ma. devātā Ekavālaggakoṭiokāsamatte dasapi vīsampi tiṃsampi cattāḷīsampi paññāsampi saṭṭhipi sattatipi asītipi sukhumattabhāve nimminitvā sabbadevamārabrahmāno siriyā ca tejasā ca atikkamma virocamānaṃ paññattapavarabuddhāsane nisinnaṃ bhagavantaṃ parivāretvā ṭhitā disvā disvā tasmiṃ ca samaye anāgatānampi sakalajambudīpakānaṃ manussānaṃ cetasā cetoparivitakkamaññāya sabbesaṃ devamanussānaṃ vicikicchāsallasamuddharaṇatthaṃ āha "bahū devā manussā ca maṅgalāni acintayuṃ ākaṅkhamānā sotthānaṃ, attano sotthibhāvaṃ icchantā, brūhi maṅgalamuttamaṃ, tesaṃ devānaṃ anumatiyā manussānaṃ ca anuggahena mayā puṭṭho samāno yaṃ sabbesameva amhākaṃ ekantahitasukhāvahanato uttamaṃ maṅgalaṃ, taṃ no anukampaṃ upādāya brūhi bhagavā"ti.

[262] Evametaṃ devaputtassa vacanaṃ sutvā bhagavā "asevanā ca bālānan"ti gāthamāha. Tattha asevanāti abhajanā apayirupāsanā. Bālānanti balanti assasantīti bālā, kiṃ balanti ? assasitapassasitamattena jīvanti, na paññājīvinoti adhippāyo. Tesaṃ bālānaṃ. Paṇḍitānanti paṇḍantīti paṇḍitā, sandiṭṭhikasamparāyikesu atthesu ñāṇagatiyā gacchantīti adhippāyo. Tesaṃ paṇḍitānaṃ. Sevanāti bhajanā payirupāsanā taṃsahāyatā taṃsampavaṅkatā. Pūjāti sakkāragarukāramānanavandanā. Pūjaneyyānanti pūjārahānaṃ. Etammaṅgalamuttamanti yā ca bālānaṃ asevanā, yā ca paṇḍitānaṃ sevanā, yā ca pūjaneyyānaṃ pūjā, taṃ sabbaṃ sampiṇḍetvā.

Atthavaṇṇanā panassā evaṃ veditabbā:- evametaṃ devaputtassa vacanaṃ sutvā bhagavā asevanā ca bālānanti imaṃ gāthamāha. Tatthāyaṃ catubbidhā kathā pucchitakathā apucchitakathā sānusandhikathā ananusandhikathāti. Tattha "pucchāmi taṃ gotama