@ 5-5 cha.Ma. assaddhaṃ saddhāsampadāya patiṭṭhāpeti

@6 cha.Ma. attasammāpaṇidhīti 7 cha.Ma. eso

[264] Idāni bāhusaccañcāti ettha bāhusaccanti bahussutabhāvo. Sippanti yaṃ kiñci hatthakosallaṃ. Vinayoti kāyavācācittavinayanaṃ. Susikkhitoti suṭṭhu sikkhito. Subhāsitāti suṭṭhu bhāsitā. Yāti aniyamaniddeso. Vācāti girā byapatho. Sesaṃ vuttanayamevāti. Ayamettha padavaṇṇanā.

Atthavaṇṇanā pana evaṃ veditabbā:- bāhusaccaṃ nāma yaṃ taṃ "bahussuto hoti sutadharo sutasanniccayo"ti ca "idhekaccassa bahu sutaṃ hoti suttaṃ geyyaṃ veyyākaraṇan"ti ca evamādinā nayena satthusāsanadharattaṃ vaṇṇitaṃ, taṃ akusalappahānakusalādhigamahetuto anupubbena paramatthasaccasacchikiriyahetuto ca "maṅgalan"ti vuccati. Vuttañhetaṃ bhagavā:-