Ayampi ubhayalokahitasukhāvahanato "maṅgalan"ti veditabbā. Yasmā ca ayaṃ vinayapariyāpannā eva, tasmā vinayaggahaṇena etaṃ asaṅgaṇhitvā vinayo saṅgahetabbo. Atha vā kiṃ iminā parissamena, paresaṃ dhammadesanāvācā idha "subhāsitā vācā"ti veditabbā. Sā hi yathā patirūpadesavāso, evaṃ sattānaṃ ubhayalokahitasukhanibbānādhigamappaccayato "maṅgalan"ti vuccati. Āha ca:-

"yaṃ buddho bhāsatī vācaṃ khemaṃ nibbānapattiyā

dukkhassantakiriyāya sā ve vācānamuttamā"ti.

Evaṃ imissā gāthāya bāhusaccañca, sippañca, vinayo ca susikkhito, subhāsitā ca yā vācāti cattāri maṅgalāni vuttāni, maṅgalattañca nesaṃ tattha tattha vibhāvitamevāti.