[266] Idāni dānañcāti ettha dīyate imināti dānaṃ, attano santakaṃ parassa paṭipādiyatīti vuttaṃ hoti. Dhammassa cariyā, dhammā vā anapetā cariyā dhammacariyā. Ñāyante "amhākaṃ ime"ti ñātakā. Na avajjāni anavajjāni, aninditāni agarahitānīti vuttaṃ hoti. Sesaṃ vuttanayamevāti ayaṃ padavaṇṇanā.

Atthavaṇṇanā pana evaṃ veditabbā:- dānaṃ nāma paraṃ uddissa subuddhipubbikā annādidasadānavatthupariccāgacetanā, taṃsampayutto vā alobho. Tena hi taṃ vatthuṃ parassa paṭipādeti. Tena vuttaṃ "dīyate imināti dānan"ti. Taṃ bahujanapiyatādīnaṃ diṭṭhadhammikasamparāyikānaṃ phalavisesānaṃ adhigamahetuto "maṅgalan"ti vuttaṃ "dāyako sīha dānapati bahuno janassa piyo hoti mānāpo"ti evamādīni cettha suttāni anussaritabbāni.

@4 cha.Ma. bahujanapiyamanāpatādīnaṃ 5 aṅ.pañcaka. 22/34/41 (syā)