paradāragamanañceva nappasaṃsanti paṇḍitā"ti evaṃ gāthāya saṅgahitaṃ kammakilesasaṅkhātaṃ catubbidhaṃ akusalaṃ, tato pāpā. Sabbāpesā ārati ca virati ca diṭṭhadhammikasamparāyikabhayaverappahānādinānappakāravisesādhigamahetuto "maṅgalan"ti vuccati. "pāṇātipātā paṭivirato kho gahapatiputta ariyasāvako"ti- ādīni cettha suttāni anussaritabbāni.

Majjapānā ca saṃyamo nāma pubbe vuttasurāmerayamajjapamādaṭṭhānā veramaṇiyā cetaṃ adhivacanaṃ. Yasmā pana majjapāyī atthaṃ na jānāti, dhammaṃ na jānāti, mātupi antarāyaṃ karoti, pitu buddhapaccekabuddhatathāgatasāvakānampi antarāyaṃ karoti, diṭṭhadhamme garahaṃ, samparāye duggatiṃ aparāpariyāye ummādaṃ pāpuṇāti. Majjapānā pana saṃyamo tesaṃ dosānaṃ vūpasamaṃ tabbiparītaguṇasampadañca pāpuṇāti. Tasmā ayaṃ majjapānā saṃyamo "maṅgalan"ti veditabbo.

Kusalesu dhammesu appamādo nāma "kusalānaṃ vā dhammānaṃ bhāvanāya asakkaccakiriyatā asātaccakiriyatā anaṭṭhitakiriyatā olīnavuttitā nikkhittacchandatā nikkhittadhuratā

Yo evarūpo pamādo pamajjanā pamajjitattaṃ, ayaṃ vuccati, pamādo"ti ettha vuttassa pamādassa paṭipakkhanayena atthato kusalesu dhammesu satiyā avippavāso veditabbo. So nānappakārakusalādhigamahetuto vā amatādhigamahetuto vā "maṅgalan"ti vuccati. Tattha "appamattassa ātāpino"ti ca "appamādo amataṃ padan"ti ca evamādi satthu sāsanaṃ anussaritabbanti.