Vaṅgīso gāthaṃ sutvā "imaṃ me bho gotama vijjaṃ dehī"ti āha, bhagavā "nāyaṃ vijjā apabbajitānaṃ sampajjatī"ti āha. So "pabbājetvā vā maṃ bho gotama yaṃ vā icchasi, taṃ katvā imaṃ vijjaṃ dehī"ti āha. Tadā ca bhagavato nigrodhakappatthero samīpe hoti, taṃ bhagavā āṇāpesi "tenahi nigrodhakappa imaṃ pabbājehī"ti. So taṃ pabbājetvā tacapañcakakammaṭṭhānamācikkhi. Vaṅgīso anupubbena paṭisambhidāppatto arahā ahosi etadagge ca bhagavatā niddiṭṭho "etadaggaṃ bhikkhave mama sāvakānaṃ bhikkhūnaṃ paṭibhānavantānaṃ yadidaṃ vaṅgīso"ti.
@3 vi.pa. 8/339/315, 4 aṅ.ekaka. 20/213/24
Evaṃ samudāgatassa āyasmato vaṅgīsassa upajjhāyo vajjāvajjādiupanijjhāyanena evaṃ laddhavohāro nigrodhakappo nāma thero. Kappoti tassa therassa nāmaṃ, nigrodhamūle pana arahattaṃ adhigatattā "nigrodhakappo"ti bhagavatā vutto. Tato naṃ bhikkhūpi evaṃ voharanti. Sāsane thirabhāvaṃ pattoti thero. Aggāḷave cetiye aciraparinibbuto hotīti tasmiṃ cetiye aciraparinibbuto hoti. Rahogatassa paṭisallīnassāti gaṇamhā vūpakaṭṭhattā rahogatassa kāyena, paṭisallīnassa cittena tehi tehi visayehi paṭinivattitvā sallīnassa evaṃ cetaso parivitakko udapādīti iminā ākārena parivitakko uppajji. Kasmā pana udapādīti? asammukhattā diṭṭhāsevanattā ca. Ayaṃ hi tassa parinibbānakāle na sammukhā ahosi, diṭṭhapubbaṃ panetassa hatthakukkuccādipubbāsevanaṃ, tādisaṃ ca akhīṇāsavānampi hoti, khīṇāsavānampi pubbaparicayena. Tathā hi piṇḍolabhāradvājo pacchābhattaṃ divāvihāratthāya udenassa uyyānameva gacchati pubbe rājā hutvā tattha paricāresīti iminā pubbaparicayena, gavampatitthero tāvatiṃsabhavane suññaṃ devavimānaṃ gacchati devaputto hutvā tattha paricāresīti iminā pubbaparicayena, pilindavaccho bhikkhū vasalavādena samudācarati abbokiṇṇāni pañca jātisatāni brāhmaṇo hutvā tathā abhāsīti iminā pubbaparicayena. Tasmā asammukhattā diṭṭhāsevanattā cassa evaṃ cetaso parivitakko udapādi "parinibbuto nu kho me upajjhāyo, udāhu no parinibbuto"ti. Tato paraṃ uttānatthameva. Ekaṃsaṃ cīvaraṃ katvāti ettha pana punappunaṃ saṇṭhāpanena evaṃ vuttaṃ. Ekaṃsanti ca vāmaṃsaṃ pārupitvā ṭhitassetaṃ adhivacanaṃ, yato yathā vāmaṃsaṃ pārupitvā ṭhitaṃ hoti, tathā cīvaraṃ katvāti evamassa attho veditabbo. Sesaṃ pākaṭameva.