@6 cha.Ma.,i. ayaṃ pāṭho na dissati 7 ka. kāreyyunti Dviyojanamattā, tatiyadivase tiyojanamattā. Kumārā cintesuṃ "mahā ayaṃ balakāyo, sace mayaṃ kañci sāmantarājānaṃ atikkamitvā janapadaṃ gaṇhissāma, sopi no na pahossati, kiṃ paresaṃ pīḷaṃ katvā laddharajjena, mahājambudīpo, araññe nagaraṃ māpessāmā"ti himavantābhimukhā agamiṃsu,

tattha nagaramāpanokāsaṃ pariyesamānā himavati kapilo nāma tāpaso ghoratapo paṭivasati pokkharaṇitīre mahāsākasaṇḍe, tassa vasanokāsaṃ gatā. So te disvā pucchitvā taṃ sabbaṃ pavattiṃ sutvā tesu anukampaṃ akāsi. So kira bhūmijayavasaṃ nāma vijjaṃ jānāti, yāya uddhaṃ asītihatthe ākāse ca heṭṭhābhūmiyaṃ ca guṇadose passati. Athekasmiṃ padese sūkaramigā sīhabyagghādayo tāsetvā paripātenti, maṇḍūkamūsikā sappe bhiṃsāpenti. So te disvā "ayaṃ bhūmippadeso paṭhavīaggan"ti tasmiṃ padese assamaṃ māpesi. Tato so rājakumāre āha "sace mama nāmena nagaraṃ karotha, demi vo imaṃ okāsan"ti. Te tathā paṭijāniṃsu. Tāpaso "imasmiṃ okāse ṭhatvā caṇḍālaputtopi cakkavattiṃ balena atisetī"ti vatvā "assame rañño gharaṃ māpetvā nagaraṃ māpethā"ti taṃ okāsaṃ datvā sayaṃ avidūre pabbatapāde assamaṃ katvā vasi. Tato kumārā tattha nagaraṃ māpetvā kapilassa vutthokāse katattā "kapilavatthun"ti nāmaṃ āropetvā tattha nivāsaṃ kappesuṃ.

Atha amaccā "ime kumārā vayappattā, yadi nesaṃ pitā santike bhaveyya, so āvāhavivāhaṃ kareyya, idāni pana amhākaṃ bhāro"ti cintetvā kumārehi saddhiṃ mantesuṃ. Kumārā "amhākaṃ sadisā khattiyadhītaro na passāma, tāsampi bhaginīnaṃ sadise khattiyakumāre, jātisambhedaṃ ca na karomā"ti. Te jātisambhedabhayena