Tato vayappatte kumāre mātā āṇāpesi "tātā tumhākaṃ kapilavatthuvāsino sakyā mātulā honti, dhītaro nesaṃ gaṇhathā"ti. Te yaṃ divasaṃ khattiyakaññāyo nadīkīḷanaṃ gacchanti, taṃ divasaṃ gantvā nadītitthaṃ uparundhitvā nāmāni sāvetvā patthitā patthitā rājadhītaro gahetvā agamaṃsu. Sakyarājāno sutvā "hotu bhaṇe, amhākaṃ ñātakā ete"ti tuṇhī ahesuṃ. Ayametesaṃ koliyānaṃ uppatti.

Evaṃ tesaṃ sākiyakoliyānaṃ aññamaññaṃ āvāhavivāhaṃ karontānaṃ āgato vaṃso yāva sīhahanurājā, tāva vitthārato veditabbo:- sīhahanurañño kira pañca puttā ahesuṃ suddhodano amitodano dhotodano sakkodano sukkodanoti.

@3 cha.Ma.,i. ayaṃ koliyānaṃ 4 Sī. sukkodano asukkodanoti Tesu suddhodane rajjaṃ kārayamāne tassa pajāpatiyā añjanarañño dhītāya mahāmāyādeviyā kucchimhi pūritapāramī mahāpuriso jātakanidāne vuttanayeneva tusitapurā cavitvā paṭisandhiṃ gahetvā anupubbena katamahābhinikkhamano sammāsambodhiṃ abhisambujjhitvā pavattitapavaradhammacakko anukkamena kapilavatthuṃ gantvā suddhodanamahārājādayo ariyaphale patiṭṭhāpetvā janapadacārikaṃ caritvā punapi aparena samayena paccāgantvā paṇṇarasahi bhikkhusatehi saddhiṃ kapilavatthusmiṃ viharati nigrodhārāme.