[365] Tatiyagāthāya "anurodhavirodhavippahīno"ti sabbavatthūsupahīnarāgadoso. Sesaṃ vuttanayameva. Sabbagāthāsu ca "sopi bhikkhu sammā loke paribbajeyyā"ti yojetabbaṃ. Ito paraṃ hi yojanampi avatvā avuttanayameva vaṇṇayissāma.

[366] Catutthagāthāya sattasaṅkhāravasena duvidhaṃ piyañca appiyañca veditabbaṃ, tattha chandarāgapaṭighappahānena hitvā. Anupādāyāti catūhi upādānehi kañci dhammaṃ aggahetvā. Anissito kuhiñcīti aṭṭhasatabhedena taṇhānissayena dvāsaṭṭhibhedena diṭṭhinissayena ca kuhiñci rūpādidhamme bhave vā anissito. Saṃyojaniyehi vippamuttoti sabbepi tebhūmakadhammā dasavidhasaṃyojanassa visayattā saṃyojaniyā, tehi sabbappakārato maggabhāvanāya pariññātattā pahīnattā ca vippamuttoti attho. Paṭhamapādena cettha rāgadosappahānaṃ vuttaṃ, dutiyena upādānanissayābhāvo, tatiyena sesākusalehi akusalavatthūhi ca vippamokkho. Paṭhamena vā rāgadosappahānaṃ, dutiyena tadupāyo, tatiyena tesaṃ pahīnattā saṃjoniyehi vippamokkhoti veditabbo.

[367] Pañcamagāthāya upadhīsūti khandhupadhīsupi. Ādānanti ādātabbaṭṭhena teyeva vuccanti anaññaneyyoti aniccādīnaṃ sudiṭṭhattā "idaṃ seyyo"ti kenaci anetabbo. Sesaṃ uttānapadatthameva. Idaṃ vuttaṃ hoti:- ādānesu catutthamaggena sabbaso chandarāgaṃ vinetvā so vinītacchandarāgo tesu upadhīsu na sārameti, sabbe upadhī asārakatteneva passati. Tato tesu dubbidhesupi nissayesu anissito aññena vā kenaci "idaṃ seyyo"ti anetabbo khīṇāsavo bhikkhu sammā so loke paribbajeyya.

[368] Chaṭṭhagāthāya aviruddhoti etesaṃ tiṇṇaṃ duccaritānaṃ pahīnattā sucaritehi saddhiṃ aviruddho. Viditvā dhammanti maggena catusaccadhammaṃ ñatvā