@3 ka. atthena vā 4 ka. viditvā Nibbānapadābhipatthayānoti anupādisesakhandhanibbānapadaṃ patthayamāno. Sesamuttānatthameva.

[369] Sattamagāthāya akuṭṭhoti dasahi akkosavatthūhi abhisatto. Na sandhiyethāti na upanayhetha na kuppeyya. Laddhā parabhojanaṃ na majjeti parehi dinnaṃ saddhādeyyaṃ labhitvā "ahaṃ ñāto yasassī lābhī"ti na majjeyya. Sesamuttānatthameva.

[370] Aṭṭhamagāthāya lobhanti visamalobhaṃ. Bhavanti kāmabhavādiṃ. Evaṃ dvīhi padehi bhavabhogataṇhā vuttā. Purimena vā sabbāpi taṇhā, pacchimena kāmabhavo. Virato chedabandhanā cāti evametesaṃ kammakilesānaṃ pahīnattā parasattachedanā bandhanā ca viratoti. Sesamettha vuttanayameva.