[396] Evaṃ khīṇāsavapaṭipattiṃ dassento arahattanikūṭena anagāriyapaṭipadaṃ niṭṭhāpetvā idāni agāriyapaṭipadaṃ dassetuṃ "gahaṭṭhavattaṃ pana vo"tiādimāha. Tattha paṭhamagāthāya tāva sāvakoti agāriyasāvako, sesaṃ uttānatthameva. Ayaṃ pana yojanā:- yo mayā ito pubbe kevalo abyāmisso sakalo paripuṇṇo bhikkhudhammo kathito, esa khettavatthuādipariggahehi sapariggahena na labbhā phassetuṃ na sakkā adhigantunti.

[397] Evaṃ tassa bhikkhudhammaṃ paṭisedhetvā gahaṭṭhadhammameva dassento āha "pāṇaṃ na hane"ti. Tattha purimaḍḍhena tikoṭiparisuddhā pāṇātipātā veramaṇi vuttā pacchimaḍḍhena sattesu hitapaṭipatti. Tatiyapādo cettha khaggavisāṇasutte catutthapāde thāvaratasabhedo mettasuttavaṇṇanāyaṃ sabbappakārato vaṇṇito. Sesaṃ uttānatthameva. Uppaṭipāṭiyā pana yojanā kātabbā:- tasathāvaresu sabbesu bhūtesu nidhāya daṇḍaṃ na hane na ghātayeyya nānujaññāti. "nidhāya daṇḍan"ti ito vā paraṃ "vatteyyā"ti pāṭhaseso āharitabbo. Itarathā hi na pubbenāparaṃ sandhiyatīti.

[398] Evaṃ paṭhamasikkhāpadaṃ dassetvā idāni dutiyasikkhāpadaṃ dassento āha "tato adinnan"ti tattha kiñcīti appaṃ vā bahuṃ vā. Kvacīti gāme vā araññe vā. Sāvakoti agāriyasāvako. Bujjhamānoti "parasantakamidan"ti jānamāno. Sabbaṃ adinnaṃ parivajjayeyyāti evaṃ hi parivajjamāno sabbaṃ adinnaṃ parivajjayeyya, no aññathāti dīpeti. Sesamettha vuttanayañca pākaṭañcāti.