@3 ka......ādiguṇasiddhattā 4 ka. anāgāriyabhāvaṃ Āmantesi. Apica bhājanaṃ te imāya kathāya yathānusiṭṭhaṃ paṭipattisabhāvatotipi te eva āmantesi. Bhadanteti gāravādhivacanametaṃ. Te bhikkhūti ye bhagavā āmantesi, te eva bhagavantaṃ ālapayamānā bhagavato paccassosunti.

Catūhi aṅgehīti catūhi kāraṇehi, avayavehi vā. Musāvādāveramaṇiādīni hi cattāri subhāsitavācāya kāraṇāni, saccavacanādayo cattāro avayavā, kāraṇatthe ca aṅgasaddo. Catūhi aṅgehīti nissakkavacanaṃ hoti, avayavatthe karaṇavacanaṃ. Samannāgatāti samanuāgatā pavattā yuttā ca. Vācāti samullapanavācā, yā sā "vācā girā byapatho"ti ca, "vācā neḷā kaṇṇasukhā"ti ca evamādīsu āgacchati. Yāyaṃ pana "vācāya ce kataṃ kamman"ti evaṃ viññatti ca, "yā catūhi vacīduccaritehi ārati virati .pe. Ayaṃ vuccati sammāvācā"ti evaṃ virati ca, "pharusavācā bhikkhave āsevitā bhāvitā bahulīkatā nirayasaṃvattanikā hotī"ti evaṃ cetanā ca vācāti āgacchati, sā idha anadhippetā. Kasmā? abhāsitabbato. Subhāsitā hotīti suṭṭhu bhāsitā. Tenassā atthāvahanataṃ dīpeti. Na dubbhāsitāti na duṭṭhu bhāsitā. Tenassā anatthānāvahanataṃ dīpeti. Anavajjāti vajjasaṅkhātarāgādidosavirahitā. Tenassā kāraṇasuddhitaṃ agatigamanādipattidosābhāvañca dīpeti. Ananuvajjā cāti anuvādavimuttā. Tenassā sabbākārasampattiṃ dīpeti. Viññūnanti paṇḍitānaṃ. Tena nindāpasaṃsāsu bālā appamāṇāti dīpeti.