sukatā hoti tasmāhaṃ karissāmi tatheva tanti.

Kena panetaṃ pakāsitaṃ, kattha kadā kasmā cāti. Vuccate:- bhagavatā pakāsitaṃ, tañca pana rājagahe dutiyadānadivase rañño māgadhassa anumodanatthaṃ. Imassa ca atthassa vibhāvanatthaṃ ayamettha vitthārakathā veditabbā:-

ito dvānavutikappe kāsi nāma nagaraṃ ahosi, tattha jayaseno nāma rājā, tassa sirimā nāma devī, tassā kucchiyaṃ pusso nāma bodhisatto nibbattitvā anupubbena sammāsambodhiṃ abhisambujjhi. Jayaseno rājā "mama putto abhinikkhamitvā buddho jāto, mayhameva buddho, mayhaṃ dhammo, mayhaṃ saṃgho"ti mammattaṃ uppādetvā sabbakālaṃ sayameva upaṭṭhahati, aññesaṃ okāsaṃ na deti.