datvā attamano hoti esā yaññassa sampadā"ti yaññasampadā vuttā, tāya sampanno yañño bhavissati. Tattha siyā "kathaṃ cittaṃ pasādetabban"ti? dosappahānena. Kathaṃ dosappahānaṃ hoti? yaññārammaṇatāya. Ayaṃ hi ārammaṇaṃ yajamānassa yañño ettha patiṭṭhāya jahāti dosaṃ, ayaṃ hi sattesu mettāpubbaṅgamena sammādiṭṭhipadīpavihatamohandhakārena cittena yajamānassa deyyadhammasaṅkhāto yañño ārammaṇaṃ hoti, so ettha yaññe ārammaṇavasena pavattiyā patiṭṭhāya deyyadhammapaccayaṃ lobhaṃ, paṭiggāhakapaccayaṃ kodhaṃ, tadubhayanidānaṃ mohanti evaṃ tividhampi jahāti dosaṃ. So evaṃ bhogesu vītarāgo sattesu ca viheyya dosaṃ tappahāreneva pahīnapañcanīvaraṇo anukkamena upacārappanābhedaṃ aparimāṇasattapharaṇena ekasatte vā anavasesapharaṇena appamāṇaṃ mettacittaṃ bhāvento puna bhāvanāya vepullatthaṃ rattindivaṃ sasataṃ sabbairiyāpathesu appamatto hutvā tameva mettajjhānasaṅkhātaṃ sabbā disā pharate appamaññanti.

[514] Atha brāhmaṇo taṃ mettaṃ "brahmalokamaggo ayan"ti ajānanto kevalaṃ attano visayātītaṃ mettābhāvanaṃ sutvā suṭṭhutaraṃ sañjātasabbaññusambhāvano

@i. paṭivineyya Bhagavati attanā brahmalokādhimuttattā brahmalokūpapattimeva ca suddhiṃ muttiñca maññamāno brahmalokamaggaṃ pucchanto "ko sujjhatī"ti gāthamāha. Tatra ca brahmalokagāmiṃ puññaṃ karontaṃ sandhāyāha "ko sujjhati muccatī"ti, akarontaṃ sandhāya "bajjhatī cā"ti. Kenattanāti. Kena kāraṇena. Sakkhi brahmajjadiṭṭhoti brahmā ajja sakkhi diṭṭho. Saccanti bhagavato brahmasamattaṃ ārabbha accādarena pucchaṃ karoti. Kathaṃ upapajjatīti accādareneva punapi pucchati. Jutimāti bhagavantaṃ ālapati.