@4 cha.Ma., i. taṃ 5 cha.Ma., i. taṃ kho 6 cha.Ma., i. dutiyadivase 7 cha.Ma., i. mamattaṃ

Bhagavato kaniṭṭhabhātaro vemātikā tayo bhātaro cintesuṃ "buddhā nāma sabbalokahitatthāya uppajjanti, na cekasseva atthāya, amhākañca pitā aññesaṃ okāsaṃ na deti, kathannu mayaṃ labheyyāma bhagavantaṃ upaṭṭhātun"ti. Tesaṃ etadahosi "handa mayaṃ kiñci upāyaṃ karomā"ti. Te paccantaṃ kuppitaṃ viya kārāpesuṃ. Tato rājā "paccanto kuppito"ti sutvā tayopi putte paccantaṃ vūpasamanatthaṃ pesesi. Te paccantaṃ vūpasametvā āgatā, rājā tuṭṭho varaṃ adāsi "yaṃ icchatha, taṃ gaṇhathā"ti. Te "mayaṃ bhagavantaṃ upaṭṭhātuṃ icchāmā"ti āhaṃsu. Rājā "etaṃ ṭhapetvā aññaṃ gaṇhathā"ti āha. Te "mayaṃ aññena anatthikā"ti āhaṃsu. "tenahi paricchedaṃ katvā gaṇhathā"ti. Te satta vassāni yāciṃsu, rājā nādāsi. Evaṃ cha pañca cattāri tīṇi dve ekaṃ saṃvaccharaṃ, satta māsāni cha pañca cattāri yāva temāsaṃ yāciṃsu. Rājā "gaṇhathā"ti adāsi.

Te varaṃ labhitvā paramatuṭṭhā bhagavantaṃ upasaṅkamitvā vanditvā āhaṃsu "icchāma mayaṃ bhante bhagavantaṃ temāsaṃ upaṭṭhātuṃ, adhivāsetu no bhante bhagavā imaṃ temāsaṃ vassāvāsan"ti. Adhivāsesi bhagavā tuṇhībhāvena. Tato te attano janapadesu niyuttakapurisassa lekhaṃ pesesuṃ "imaṃ temāsaṃ amhehi bhagavā upaṭṭhātabbo, vihāraṃ ādiṃ katvā sabbaṃ bhagavato upaṭṭhānasambhāraṃ sampādehī"ti. So taṃ sabbaṃ sampādetvā lekhaṃ paṭipesesi. Te kāsāyavatthanivatthā hutvā aḍḍhateyyehi purisasahassehi veyyāvaccakarehi bhagavantaṃ sakkaccaṃ upaṭṭhahamānā janapadaṃ netvā vihāraṃ niyyādetvā vassaṃ vasāpesuṃ.

Tesaṃ bhaṇḍāgāriko eko gahapatiputto sapajāpatiko saddho ahosi pasanno, so buddhappamukhassa saṃghassa dānavattaṃ sakkaccaṃ adāsi. Janapade niyuttakapuriso taṃ gahetvā jānapadehi ekādasamattehi purisasahassehi saddhiṃ sakkaccameva dānaṃ pavattāpesi. Tattha keci jānapadā paṭihatacittā ahesuṃ, te dānassa antarāyaṃ katvā deyyadhamme attanāpi khādiṃsu, puttānampi adaṃsu