@3 cha.Ma., i. puttānampi adaṃsūti na dissati. Bhattasālañca agginā dahiṃsu. Pavārite rājaputtā bhagavato mahantaṃ sakkāraṃ katvā bhagavantaṃ purakkhitvā pituno sakāsameva agamaṃsu. Tattha gantvāva bhagavā parinibbāyi. Rājā ca rājaputtā ca janapade niyuttakapuriso ca bhaṇḍāgāriko ca anupubbena kālaṃ katvā saddhiṃ parisāya sagge uppajjiṃsu, paṭihatacittā janā nirayesu uppajjiṃsu. Evaṃ tesaṃ dvinnaṃ gaṇānaṃ saggato saggaṃ nirayato nirayaṃ upapajjantānaṃ dvānavuti kappā vītivattā.

Atha imasmiṃ bhaddakappe kassapabuddhakāle te paṭihatacittā janā petesu uppannā. Tadā manussā attano ñātakānaṃ petānaṃ atthāya dānaṃ datvā uddisanti "idaṃ amhākaṃ ñātīnaṃ hotū"ti. Te sampattiṃ labhanti. Atha imepi petā taṃ disvā bhagavantaṃ kassapaṃ upasaṅkamitvā pucchiṃsu "kinnukho bhante mayampi evarūpaṃ sampattiṃ labheyyāmā"ti. Bhagavā āha "idāni na labhatha, apica kho anāgate gotamo nāma buddho bhavissati, tassa bhagavato kāle bimbisāro nāma rājā bhavissati, so tumhākaṃ ito dvānavutikappe ñāti ahosi, so buddhassa dānaṃ datvā tumhākaṃ uddisissati, tadā labhissathā"ti. Evaṃ vutte kira tesaṃ petānaṃ taṃ vacanaṃ "sve labhissathā"ti vuttaṃ viya ahosi.

Atha ekasmiṃ buddhantare vītivatte amhākaṃ bhagavā loke uppajji. Tepi tayo rājaputtā tehi aḍḍhateyyehi purisasahassehi saddhiṃ devalokato cavitvā magadharaṭṭhe brāhamṇakulesu uppajjitvā anupubbena isipabbajjaṃ pabbajitvā gayāsīse tayo jaṭilā ahesuṃ, janapade niyuttakapuriso rājā ahosi bimbisāro, bhaṇḍāgāriko gahapatiputto visākho nāma mahāseṭṭhī ahosi, tassa pajāpatī dhammadinnā nāma seṭṭhidhītā ahosi. Evaṃ sabbāpi avasesā parisā bimbisārarañño eva parivārā hutvā nibbāttā.