[3] Evaṃ bhagavā anappakepi annapānādimhi paccupaṭṭhite "api nāma amhe uddissa kiñci dadeyyun"ti ñātīnaṃ paccāsiṃsantānaṃ vicarataṃ tesaṃ petasattānaṃ tehi katassa atikaṭukadukkhavipākassa kammassa paccayena kassaci ñātino anussaraṇamattābhāvaṃ dassento:-

"pahūte annapānamhi khajjabhojje upaṭṭhite

na tesaṃ koci sarati sattānaṃ kammapaccayā"ti vatvā puna rañño pittivisayūpapanne ñātake uddissa dinnaṃ dānaṃ pasaṃsanto "evaṃ dadanti ñātīnan"ti tatiyagāthamāha.

Tattha evanti upamāvacanaṃ, tassa dvidhā sambandho:- tesaṃ sattānaṃ kammapaccayā asarantepi kismiñci dadanti ñātīnaṃ, ye evaṃ anukampakā hontīti ca, yathā tayā mahārāja dinnaṃ, evaṃ suciṃ paṇītaṃ kālena kappiyaṃ pānabhojanaṃ dadanti ñātīnaṃ, ye honti anukampakāti ca. Tattha dadantīti denti uddisanti niyyādenti. Ñātīnanti mātito ca pitito ca sambandhānaṃ. Yeti yekeci puttā vā dhītaro vā bhātaro vā. Hontīti bhavanti. Anukampakāti atthakāmā hitesino. Sucinti vimalaṃ dassaneyyaṃ manoramaṃ dhammikaṃ dhammaladdhaṃ. Paṇītanti uttamaṃ seṭṭhaṃ. Kālenāti ñātipetānaṃ tirokuḍḍādīsu āgantvā ṭhitakālena. Kappiyanti anucchavikaṃ paṭirūpaṃ ariyānaṃ paribhogārahaṃ. Pānabhojananti pānañca bhojanañca pānabhojanaṃ. Idha pānabhojanamukhena sabbopi deyyadhammo adhippeto.