Purohito tena nibbijjitvā "pabbajjāmahaṃ mahārājā"ti āha. Rājā tassa nicchayaṃ ñatvā "tenahi ācariya mameva uyyāne vasitabbaṃ, yathā te ahaṃ abhiṇhaṃ passeyyan"ti yāci, so "evaṃ hotū"ti paṭissuṇitvā tāpasapabbajjaṃ pabbajitvā raññā upaṭṭhahiyamāno uyyāneyeva vasanto kasiṇaparikammaṃ katvā aṭṭha samāpattiyo pañcābhiññāyo ca nibbattesi. So tato pabhuti rājakule bhattakiccaṃ katvā himavantacātumahārājikanāgabhavanādīnaṃ aññataraṃ gantvā divāvihāraṃ karoti. Athekadivasaṃ tāvatiṃsabhavanaṃ gantvā ratanavimānaṃ pavisitvā dibbaratanapallaṅke nisinno samādhisukhaṃ anubhavitvā sāyanhasamayaṃ vuṭṭhāya vimānadvāre ṭhatvā ito cito ca vilokento saṭṭhiyojanāya mahāvīthiyā celukkhepaṃ katvā bodhisattaguṇapasaṃsitāni thutivacanāni vatvā kīḷante sakkappamukhe deve addasa. Tenāha āyasmā ānando "ānandajāte .pe. Divāvihāre"ti.

[686] Tato so evaṃ disvāna deve .pe. Kiṃ paṭicca. Tattha udaggeti abbhunnatakāye. Cittiṃ karitvāti ādaraṃ katvā. Kalyarūpoti tuṭṭharūPo. Sesamuttānatthameva.

[687] Idāni "yadāpi āsī"tiādikā gāthā uttānasambandhā eva. Padattho pana paṭhamagāthāya tāva saṅgamoti saṅgāmo. Jayo surānanti devānaṃ jayo.

Tassāpi vibhāvatthaṃ ayamanupubbikathā veditabbā:- sakko kira magadharaṭṭhe macalagāmavāsī tettiṃsamanussaseṭṭho magho nāma māṇavo hutvā satta vattapadāni pūretvā tāvatiṃsabhavane nibbatti saddhiṃ parisāya. Tato pubbadevā "āgantuka- devaputtā āgatā, sakkāraṃ nesaṃ karissāmā"ti vatvā dibbapadumāni upanāmesuṃ.