@3 cha.Ma. tassā 4 Sī.,Ma.,i. vatapadāni Upaḍḍharajjena ca nimantesuṃ. Sakko upaḍḍharajjena asantuṭṭho sakaparisaṃ saññāpetvā ekadivasaṃ surāmadamatte te pāde gahetvā sinerupabbatapāde khipi. Tesaṃ sinerussa heṭṭhimatale dasasahassayojanaṃ asurabhavanaṃ nibbatti pāricchattakapaṭicchannabhūtāya citrapāṭaliyā upasobhitaṃ. Tato te satiṃ paṭilabhitvā tāvatiṃsabhavanaṃ apassantā "aho re naṭṭhā mayaṃ pānamadadosena, na dāni mayaṃ suraṃ pivimhā, asuraṃ pivimhā, na dānimhā surā, asurā dāni jātamhā"ti. Tato pabhuti "asurā"iccevuppannasamaññā hutvā "handa dāni devehi saddhiṃ saṅgāmenā"ti sineruṃ purato abhiruhiṃsu. Tato sakko asure yuddhena abbhuggantvā punapi samudde pakkhipitvā catūsu dvāresu attanā sadisaṃ indapaṭimaṃ māpetvā ṭhapesi. Tato asurā "appamatto vatāyaṃ sakko niccaṃ rakkhanto tiṭṭhatī"ti cintetvā punadeva nagaraṃ āgamiṃsu. Tato devā attano jayaṃ ghosentā mahāvīthiyaṃ celukkhepaṃ karontā nakkhattaṃ kīḷiṃsu. Atha asito atītānāgate cattāḷīsakappe anussarituṃ samatthatāya "kinnu kho imehi pubbepi viya evaṃ kīḷitapubban"ti āvajjento taṃ devāsurasaṅgāme devavijayaṃ disvā āha:-

"yadāpi āsī asurehi saṅgamo

jayo surānaṃ asurā parājitā