[695] Navamagāthāya jaṭīti jaṭilo. Kaṇhasirivhayoti kaṇhasaddena ca sirisaddena ca avhayamāno. Taṃ kira "sirikaṇho"tipi avhayanti āmantenti, ālapantīti vuttaṃ hoti. Paṇḍukambaleti rattakambale. Adhikārato cettha "kumāran"ti vattabbaṃ, pāṭhaseso vā kātabbo. Purimagāthāya ca ahatthapāsagataṃ sandhāya "disvā"ti vuttaṃ, idha pana hatthapāsagataṃ paṭiggahaṇatthaṃ upanītaṃ, tasmā puna vacanaṃ disvāti. Purimaṃ vā dassanapītilābhāpekkhaṃ gāthāvasāne "vipulamalattha

@4 ka. idaṃ pana hatthapāsagataṃ paṭiggahetvā upanītaṃ, tasmā puna vacanaṃ "disvā"ti Pītin"ti vacanato, idaṃ paṭiggahāpekkhaṃ avasāne "sumano paṭiggahe"ti vacanato. Purimañca kumārasambandhameva, idaṃ setacchattasambandhampi. Disvāti satasahassagghanake gandhārarattakambale suvaṇṇanikkhaṃ viya kumāraṃ "../../bdpicture/chattaṃ marū"ti ettha vuttappakāraṃ setacchattaṃ dhāriyantaṃ muddhani disvāti. Keci pana "idaṃ mānusakaṃ chattaṃ sandhāya vuttan"ti bhaṇanti. Yatheva hi devā, evaṃ manussāpi chattacāmaramorahattha- tālapaṇṇavāḷavījanihatthā mahāpurisaṃ upagacchantīti. Evaṃ santepi na tassa vacanena kocipi atisayo atthi, tasmā yathāvuttameva sundaraṃ. Paṭiggaheti isi ubhohi hatthehi paṭiggahesi. Isiṃ kira vandāpetuṃ kumāraṃ upanesuṃ, athassa pādā parivattitvā isissa matthake patiṭṭhahiṃsu. So tampi acchariyaṃ disvā tuṭṭhacitto sumano paṭiggahesi.

[696] Dasamagāthāya jigiṃsakoti jigīsanto magganto pariyesanto, upaparikkhantoti vuttaṃ hoti. Lakkhaṇamantapāragūti lakkhaṇānaṃ vedānañca pāraṃ gato. Anuttarāyanti anuttaro ayaṃ. So kira attano abhimukhāgatesu mahāsattassa pādatalesu cakkāni disvā tadanusārena sesalakkhaṇāni jigīsanto sabbalakkhaṇasampattiṃ disvā "addhāyaṃ buddho bhavissatī"ti ñatvā evamāha.