[704] Aṭṭhārasāyaṃ sutvāna ghosanti so nālako evaṃ parivasanto anupubbena bhagavatā sambodhiṃ patvā bārāṇasiyaṃ dhammacakke pavattite taṃ "bhagavatā dhammacakkaṃ pavattitaṃ, sammāsambuddho vata so bhagavā uppanno"tiādinā nayena jinavaracakkavattane pavattaghosaṃ attano atthakāmāhi devatāni āgantvā ārocitaṃ sutvā. Gantvāna disvā isinisabhanti sattāhaṃ moneyyakolāhale kayiramāne sattame divase isipatanaṃ gantvā "nālako āgamissati, tassa dhammaṃ desessāmī"ti iminā ca abhisandhinā varabuddhāsane nisinnaṃ disvā nisabhasadisaṃ isinisabhaṃ bhagavantaṃ. Pasannoti saha dassaneneva pasannacitto hutvā. Moneyyaseṭṭhanti ñāṇuttamaṃ, maggañāṇanti vuttaṃ hoti. Samāgate asitāvhayassa sāsaneti asitassa isino ovādakāle anuppatte. Tena hi "yadā vicarati dhammamaggaṃ, tadā gantvā samayaṃ paripucchamāno carassu tasmiṃ bhagavati brahmacariyan"ti anusiṭṭho, ayañca so kālo. Tena vuttaṃ "samāgate asitāvhayassa sāsane"ti. Sesamettha pākaṭameva.

Ayaṃ tāva vatthugāthāvaṇṇanā

[705] Pucchāgāthādvaye aññātametanti viditaṃ mayā etaṃ. Yathātathanti aviparītaṃ. Ko adhippāyo? yaṃ asito "sambodhimaggaṃ phusissatāyaṃ kumāro"ti ñatvā "buddhoti ghosaṃ yada parato suṇosi, sambodhippatto vivarati dhammamaggan"ti maṃ avaca, tametaṃ mayā asitassa vacanaṃ ajja bhagavantaṃ sakkhiṃ disavā "yathātathametan"ti aññātanti. Taṃ tanti tasmā taṃ. Sabbadhammāna pāragunti hemavatasutte vuttanayena chahi ākārehi sabbadhammānaṃ pāragataṃ.