[5-6] Evaṃ bhagavā yathā pittivisayūpapannānaṃ taṃkhaṇaṃ phalanibbattakaṃ kusalakammaṃ hoti, taṃ dassento:-

"te ca tattha samāgantvā ñātipetā samāgatā

pahūte annapānamhi sakkaccaṃ anumodare"ti vatvā puna ñātake nissāya nibbattaṃ kusalakammaphalaṃ paccanubhontānaṃ tesaṃ ñātī ārabbha thomanākāraṃ dassento "ciraṃ jīvantū"ti pañcamagāthāya pacchimaḍḍhaṃ "amhākañca katā pūjā"ti chaṭṭhagāthāya pubbaḍḍhañca āha.

Tesaṃ attho:- ciraṃ jīvantūti ciraṃ jīvino dīghāyukā hontu. No ñātīti amhākaṃ ñātakā. Yesaṃ hetūti ye nissāya yesaṃ kāraṇā. Labhāmhaseti labhāma. Attanā taṃkhaṇaṃ paṭiladdhasampattiṃ apadisantā bhaṇanti petānañhi attano anumodanena, dāyakānaṃ uddesena, dakkhiṇeyyasampadāya cāti tīhi aṅgehi dakkhiṇā samijjhati, taṃkhaṇaṃ phalanibbattikā hoti. Tattha dāyakā visesahetu. Tenāhaṃsu "yesaṃ hetu labhāmhase"ti. Amhākañca katā pūjāti "idaṃ no ñātīnaṃ hotū"ti evaṃ imaṃ dānaṃ uddisantehi amhākañca katā pūjā. Dāyakā ca anipphalāti yamhi santāne pariccāgamayaṃ kammaṃ kataṃ, tassa tattheva phaladānato dāyakā ca anipphalāti.