Tassattho:- yāyaṃ diṭṭhi titthiyajanassa "sundariṃ māretvā samaṇānaṃ sakyaputtiyānaṃ avaṇṇaṃ pakāsetvā etenupāyena laddhasakkāraṃ sādiyissāmā"ti, so taṃ diṭṭhiṃ kathaṃ atikkameyya, atha kho so ayaso tameva titthiyajanaṃ paccāgato taṃ diṭṭhiṃ accetuṃ asakkontaṃ. Yo vā sassatādivādī sopi sakaṃ diṭṭhiṃ kathamaccayeyya tena diṭṭhicchandena anunīto tāya ca diṭṭhiruciyā niviṭṭho,

[789] Atha rājā sattāhaccayena taṃ kuṇapaṃ chaḍḍāpetvā sāyanhasamayaṃ vihāraṃ gantvā bhagavantaṃ abhivādetvā āha "nanu bhante īdise ayase uppanne mayhampi ārocetabbaṃ siyā"ti. Evaṃ vutte bhagavā "na mahārāja `ahaṃ sīlavā guṇasampanno'ti paresaṃ ārocetuṃ ariyānaṃ patirūpan"ti vatvā tassā aṭṭhuppattiyaṃ "yo attano sīlavatānī"ti avasesagāthāyo abhāsi.

Tattha sīlavatānīti pātimokkhādīni sīlāni āraññakādīni dhutaṅgavatāni ca anānupuṭṭhoti apucchito. Pāvāti vadati anariyadhammaṃ kusalā tamāhu, yo ātumānaṃ sayameva pāvāti yo evaṃ attānaṃ sayameva vadati, tassa taṃ vādaṃ "anariyadhammo eso"ti kusalā evaṃ kathenti.