@4 cha.Ma. nāmaṃyevāvasissati 5 i. akkhātuṃ

@6 cha.Ma.,i. ayaṃ saddo na dissati

[818-20] Idāni yo "attānaṃ bhavane na dassaye"ti evaṃ khīṇāsavo kathito, tassa vaṇṇabhaṇanatthaṃ ito parā tisso gāthāyo āha. Tattha sabbatthāti dvādasasu āyatanesu. Yadidaṃ diṭṭhasutaṃ mutesu vāti ettha pana yadidaṃ diṭṭhasutaṃ, ettha vā mutesu vā dhammesu evaṃ muni na upalimpatīti evaṃ sambandho veditabbo. Dhono na hi tena maññati, yadidaṃ diṭṭhasutaṃ mutesu vāti atrāpi yadidaṃ diṭṭhasutaṃ, tena vatthunā na maññati, mutesu vā dhammesu na maññatīti evameva sambandho veditabbo. Na hi so rajjati no virajjatīti bālaputhujjanā viya na rajjati, kalyāṇaputhujjanā sekkhā viya na virajjati, rāgassa pana khīṇattā "virāgo"tveva saṅkhayaṃ gacchatīti. Sesaṃ sabbattha pākaṭamevāti. Desanāpariyosāne caturāsītiyā pāṇasahassānaṃ dhammābhisamayo ahosīti.