[910-11] Yamāhūti pucchāgāthā. Idāni yasmā ekopi ettha vādo sacco natthi, kevalaṃ diṭṭhimattakena hi te vadanti, tasmā tamatthaṃ dassento "sakañhī"ti idaṃ tāva vissajjanagāthamāha. Tattha sammutinti diṭṭhiṃ.

[912] Evametesu sakadhammaṃ paripuṇṇaṃ bruvantesu aññassa pana dhammaṃ "hīnan"ti vadantesu yassa kassaci:- parassa ce vambhayitena hīnoti gāthā. Tassattho:- yadi parassa ninditakāraṇā hīno bhaveyya, na koci dhammesu visesi aggo bhaveyya. Kiṃkāraṇaṃ? puthū hi aññassa vadanti dhammaṃ, nihīnato sabbeva te samhi daḷhaṃ vadānā sakadhamme daḷhavādā eva.

[913] Kiñca bhiyyo:- saddhammapūjāti gāthā. Tassattho:- te ca titthiyā yathā pasaṃsanti sakāyanāni, saddhammapūjāpi nesaṃ tatheva vattati. Te hi ativiya satthārādīni sakkaronti. Tattha yadi te pamāṇā siyuṃ, evaṃ sante sabbeva vādā tathiyā bhaveyyuṃ. Kiṃkāraṇaṃ? suddhī hi nesaṃ paccattameva, na sā aññatra sijjhati, nāpi paramatthato, attani diṭṭhiggāhamattameva hi taṃ tesaṃ parappaccayaneyyabuddhīnaṃ.