Aṭṭhamanavamagāthādvayavaṇṇanā

[8-9] Evaṃ "ito dinnena yāpenti, petā kālagatā tahin"ti vatvā idāni upamāhi tamatthaṃ pakāsento "unnamevudakaṃ vuṭṭhan"ti idaṃ gāthādvayamāha.

Tassattho:- yathā unnate thale ussāde bhūmibhāge meghehi abhivuṭṭhaṃ udakaṃ ninnaṃ pavattati, yo yo bhūmibhāgo ninno onato, taṃ taṃ pavattati gacchati pāpuṇāti, evameva ito dinnaṃ dānaṃ petānaṃ upakappati nibbattati, pātubhavatīti attho. Ninnamiva hi udakappavattiyā ṭhānaṃ petaloko dānupakappanāya. Yathāha "idampi kho brāhmaṇa ṭhānaṃ, yattha ṭhitassa taṃ dānaṃ upakappatī"ti. Yathā ca kandarapadarasākhāpasākhakusubbhamahākusubbhasannipātehi vārivahā mahānajjo pūrā hutvā sāgaraṃ paripūrenti, evampi ito dinnaṃ dānaṃ pubbe vuttanayeneva petānaṃ upakappatīti.

Dasamagāthāvaṇṇanā