Tassattho:- ayañca kho mahārāja dakkhiṇā tayā ajja attano ñātigaṇaṃ uddissa dinnā, sā yasmā saṃgho anuttaraṃ puññakkhettaṃ lokassa, tasmā saṃghamhi suppatiṭṭhitā assa petajanassa dīgharattaṃ hitāya sukhāya upakappati sampajjati phalatīti vuttaṃ hoti. Upakappatīti ca ṭhānaso upakappati, taṃkhaṇaññeva upakappati, na cireneva. Yathā hi taṃkhaṇaññeva paṭibhantaṃ "ṭhānaso etaṃ tathāgataṃ paṭibhātī"ti vuccati, evamidhāpi taṃkhaṇaññeva upakappantā "ṭhānaso upakappatī"ti vuttā. Yaṃ ṭhānaṃ "idaṃ kho brāhmaṇa ṭhānaṃ, yattha ṭhitassa taṃ dānaṃ upakappatī"ti vuttaṃ, tattha khuppipāsikavantāsaparadattūpajīvinijjhāmataṇhikādibhedabhinne ṭhāne upakappatīti vuttaṃ, yathā kahāpaṇaṃ dento "kahāpaṇaṃ so detī"ti loke vuccatīti. Imasmiñca atthavikappe upakappatīti pātubhavati, nibbattatīti vuttaṃ hoti.

Terasamagāthāvaṇṇanā

[13] Evaṃ bhagavā raññā dinnāya dakkhiṇāya sātthakabhāvaṃ dassento:-

"ayañca kho dakkhiṇā dinnā saṃghamhi suppatiṭṭhitā