[9] "asādhāraṇamaññesaṃ acorāharaṇo nidhi

kayirātha dhīro puññāni yo nidhi anugāmiko"ti.

Tattha asādhāraṇamaññesanti asādhāraṇo aññesaṃ, makāro padasandhikaro "adukkhamasukhāya vedanāya sampayuttā"ti ādīsu viya. Na corehi āharaṇo acorāharaṇo, corehi ādātabbo na hotīti attho. Nidhātabboti nidhi. Evaṃ dvīhi pubbapadehi puññanidhiguṇaṃ vaṇṇetvā tato dvīhi tattha ussāhaṃ janeti "kayirātha dhīro puññāni, yo nidhi anugāmiko"ti. Tassattho:- yasmā puññanidhi nāma asādhāraṇo aññesaṃ, acorāharaṇo ca nidhi hoti. Na kevalañca asādhāraṇo acorāharaṇo ca nidhi, apica kho pana "eso nidhi sunihito, ajeyyo anugāmiko"ti evaṃ vutto yo nidhi anugāmiko, so ca yasmā puññanidhiyeva hoti, tasmā kayirātha kareyya dhīro buddhisampanno dhitisampanno ca puggalo puññānīti.

Dasamagāthāvaṇṇanā