Thero vassūpanāyikādivase te bhikkhū āmantetvā pucchi "āvuso imaṃ temāsaṃ katīhi iriyāpathehi vītināmessathāti. "catūhi bhanteti. "kiṃ panetaṃ āvuso paṭirūpaṃ, nanu appamattehi bhavitabbaṃ? mayaṃ hi dharamānassa buddhassa santikā kammaṭṭhānaṃ gahetvā āgatā, buddhā ca nāma na sakkā saṭhena ārādhetuṃ, kalyāṇajjhāsayena hete ārādhetabbā, pamattassa ca nāma cattāro apāyā sakagehasadisā, appamattā hothāvusoti. "tumhe pana bhanteti. "ahaṃ tīhi iriyāpathehi vītināmessāmi, piṭṭhiṃ na pasāressāmi āvusoti. "sādhu bhante, appamattā hothāti.
Therassa niddaṃ anokkamantassa, paṭhamamāse atikkante, akkhirogo uppajji. Chiddaghaṭato udakadhārā viya akkhīhi dhārā paggharanti. So sabbarattiṃ samaṇadhammaṃ katvā, aruṇuggamane gabbhaṃ pavisitvā nisīdi. Bhikkhū bhikkhācāravelāya therassa santikaṃ gantvā "bhikkhācāravelā bhanteti āhaṃsu. "tenahāvuso gaṇhatha pattacīvaranti attano pattacīvaraṃ gāhāpetvā nikkhami. Bhikkhū tassa akkhī paggharante disvā "kimetaṃ bhanteti pucchiṃsu. "akkhī me āvuso vātā vijjhantīti. "nanu bhante vejjenamha pavāritā, tassa katheyyāmāti. "sādhāvusoti. Te vejjassa kathayiṃsu. So telaṃ pacitvā pesesi. Thero nāsāya telaṃ āsiñcanto nisinnakova āsiñcitvā antogāmaṃ pāvisi. Vejjo disvā āha "bhante ayyassa kira akkhī vāto vijjhatīti. "āma upāsakāti. "bhante mayā telaṃ pacitvā pesitaṃ, nāsāya vo āsittanti. "āma upāsakāti. "idāni kīdisanti. "rujateva upāsakāti. Vejjo "mayā ekavāreneva vūpasamanatthaṃ telaṃ pahitaṃ, kinnu kho rogo na vūpasantoti cintetvā "bhante nisīditvā vo āsittaṃ, nipajjitvāti pucchi. Thero tuṇhī ahosi; punappunaṃ pucchiyamānopi na kathesi. So "vihāraṃ gantvā vasanaṭṭhānaṃ olokessāmīti cintetvā "tenahi bhante gacchathāti theraṃ vissajjetvā vihāraṃ gantvā therassa vasanaṭṭhānaṃ olokento caṅkamananisīdanaṭṭhānameva disvā sayanaṭṭhānaṃ adisvā "bhante nisinnehi vo āsittaṃ, nippannehīti pucchi. Thero tuṇhī ahosi. "mā bhante evamakattha; samaṇadhammo nāma, sarīre yāpente, sakkā kātuṃ; nipajjitvā āsiñcathāti punappunaṃ yāci. "gacchāvuso, Mantetvā jānissāmīti. Therassa ca tattha neva ñātī na sālohitā atthi, kena saddhiṃ manteyya? karajakāyena pana saddhiṃ mantento "vadehi tāva āvuso pālita, kiṃ akkhī olokessasi udāhu buddhasāsanaṃ? anamataggasmiṃ hi saṃsāravaṭṭe tava akkhikāṇassa gaṇanā natthi, anekāni pana buddhasatāni buddhasahassāni atītāni; tesu ekabuddhopi na paricchinno, idāni imaṃ antovassaṃ tayo māse na nipajjissāmīti te mānasaṃ baddhaṃ; tasmā cakkhūni te nassantu vā bhijjantu vā; buddhasāsanameva dhārehi, mā cakkhūnīti bhūtakāyaṃ ovadanto imā gāthā abhāsi