Mā cintayittha, mayaṃ vo paṭijaggissāmāti theraṃ assāsetvā kattabbayuttakaṃ vattapaṭivattaṃ katvā gāmaṃ pavisiṃsu. Manussā theraṃ adisvā "bhante amhākaṃ ayyo kuhinti pucchitvā taṃ pavattiṃ sutvā yāguṃ pesetvā sayaṃ piṇḍapātaṃ ādāya gantvā theraṃ vanditvā pādamūle pavaṭṭamānā roditvā "mayaṃ bhante paṭijaggissāma, tumhe mā cintayitthāti samassāsetvā pakkamiṃsu. Tato paṭṭhāya nibaddhaṃ yāgubhattaṃ vihārameva pesenti. Theropi itare saṭṭhibhikkhū nirantaraṃ ovadati. Te tassovāde ṭhatvā upakkaṭṭhāya pavāraṇāya, sabbeva saha paṭisambhidāhi arahattaṃ pāpuṇiṃsu, vutthavassā ca pana satthāraṃ daṭṭhukāmā hutvā theraṃ āhaṃsu "bhante satthāraṃ daṭṭhukāmamhāti. Thero tesaṃ vacanaṃ sutvā cintesi "ahaṃ dubbalo, antarāmagge ca amanussapariggahitā aṭavī atthi, mayi etehi saddhiṃ gacchante, sabbe kilamissanti, bhikkhaṃpi labhituṃ na sakkhissanti, ime puretarameva pesessāmīti. Atha ne āha "āvuso tumhe purato gacchathāti. "tumhe pana bhanteti. "ahaṃ dubbalo, antarāmagge ca amanussapariggahitā aṭavī atthi, mayi tumhehi saddhiṃ gacchante, sabbe kilamissatha, tumhe purato gacchathāti. "mā bhante evaṃ karittha, mayaṃ tumhehi saddhiṃyeva gamissāmāti. "mā vo āvuso evaṃ ruccittha, evaṃ sante mayhaṃ aphāsukaṃ bhavissati, mayhaṃ kaniṭṭho tumhe disvā pucchissati, athassa mama cakkhūnaṃ parihīnabhāvaṃ āroceyyātha; so mayhaṃ santikaṃ kañcideva Pahiṇissati; tena saddhiṃ āgacchissāmi; tumhe mama vacanena dasabalañca asītimahāthere ca vandathāti te uyyojesi. Te theraṃ khamāpetvā antogāmaṃ pavisiṃsu. Manussā te nisīdāpetvā bhikkhaṃ datvā "kiṃ bhante ayyānaṃ gamanākāro paññāyatīti. "āma upāsakā, satthāraṃ daṭṭhukāmamhāti. Te punappunaṃ yācitvā tesaṃ gamanachandameva ñatvā anugantvā paridevitvā nivattiṃsu. Tepi anupubbena jetavanaṃ gantvā satthārañca mahāthere ca therassa vacanena vanditvā punadivase, yattha therassa kaniṭṭho vasati; taṃ vīthiṃ piṇḍāya pavisiṃsu. Kuṭumbiko te sañjānitvā nisīdāpetvā katapaṭisanthāro, "bhātikatthero me kuhinti pucchi. Athassa te taṃ pavattiṃ ārocesuṃ. So tesaṃ pādamūle pavaṭṭento roditvā pucchi "idāni bhante kiṃ kātabbanti. "thero ito kassaci gamanaṃ paccāsiṃsati, gatakāle tena saddhiṃ āgamissatīti. "ayaṃ me bhante bhāgineyyo pālito nāma, etaṃ pesethāti. "evaṃ pesetuṃ na sakkā, magge paripantho atthi, pabbājetvā pesetuṃ vaṭṭatīti. "evaṃ katvā pesetha bhanteti. Atha naṃ pabbājetvā aḍḍhamāsamattaṃ cīvaraggahaṇādīni sikkhāpetvā maggaṃ ācikkhitvā pahiṇiṃsu. So anupubbena taṃ gāmaṃ patvā gāmadvāre ekaṃ mahallakaṃ disvā "imaṃ gāmaṃ nissāya koci āraññako vihāro atthīti pucchi. "atthi bhanteti. "ko tattha vasatīti. "pālitatthero nāma bhanteti. "maggaṃ me ācikkhathāti. "kosi Tvaṃ bhanteti. "therassa bhāgineyyomhīti. Atha naṃ gahetvā vihāraṃ nesi. So theraṃ vanditvā aḍḍhamāsamattaṃ vattapaṭivattaṃ katvā theraṃ sammā paṭijaggitvā "bhante mātulakuṭumbiko me tumhākaṃ āgamanaṃ paccāsiṃsati; etha, gacchāmāti āha. "tenahi me yaṭṭhikoṭiṃ gaṇhāhīti. So yaṭṭhikoṭiṃ gahetvā therena saddhiṃ antogāmaṃ pāvisi. Manussā theraṃ nisīdāpetvā "kiṃ bhante gamanākāro vo paññāyatīti pucchiṃsu. "āma upāsakā, gantvā satthāraṃ vandissāmīti. Te nānappakārena yācitvā alabhantā theraṃ uyyojentā upaḍḍhapathaṃ gantvā roditvā nivattiṃsu. Sāmaṇero theraṃ yaṭṭhikoṭiyā ādāya gacchanto antarāmagge aṭaviyaṃ saṅkaṭṭhanagaraṃ nāma therena upanissāya vutthapubbagāmaṃ sampāpuṇi. So tato nikkhamitvā araññe gāyitvā dārūni uddharantiyā ekissā itthiyā gītasaddaṃ sutvā sare nimittaṃ gaṇhi.