So kirāyasmā bhagavato pitucchāputto mahallakakāle pabbajito buddhasāsane uppannaṃ lābhasakkāraṃ paribhuñjanto thullasarīro ākoṭitapaccākoṭitehi cīvarehi yebhuyyena vihāramajjhe upaṭṭhānasālāyaṃ nisīdati. Tathāgatassa dassanatthāya āgatā āgantukā bhikkhū "eso mahāthero bhavissatīti saññāya tassa santikaṃ gantvā vattaṃ āpucchanti, pādasambāhanādīni āpucchanti. So tuṇhī Hoti. Atha naṃ eko daharabhikkhu "kativassā tumheti pucchitvā "vassaṃ natthi, mahallakakāle pabbajitā mayanti vutte, "āvuso dubbinīta mahallaka attano pamāṇaṃ na jānāsi, ettake mahallakatthere disvā sāmīcimattaṃpi na karosi, vatte āpucchiyamāne, tuṇhī hosi, kukkuccamattaṃpi te natthīti accharaṃ pahari. So khattiyamānaṃ janetvā "tumhe kassa santikaṃ āgatāti pucchitvā, "satthu santikanti vutte, "maṃ pana `ko esoti sallakkhetha, mūlameva vo chindissāmīti vatvā rudanto dukkhī dummano satthu santikaṃ agamāsi. Atha naṃ satthā "kinnu tvaṃ tissa dukkhī dummano assumukho rudamāno āgatosīti pucchi. Tepi bhikkhū "esa gantvā kiñci ālulikaṃ kareyyāti cintetvā teneva saddhiṃ gantvā satthāraṃ vanditvā ekamantaṃ nisīdiṃsu. So satthārā pucchito "ime maṃ bhante bhikkhū akkosantīti āha. "kahaṃ pana tvaṃ nisinnosīti. "vihāramajjhe upaṭṭhānasālāyaṃ bhanteti. "ime te bhikkhū āgacchantā diṭṭhāti. "diṭṭhā bhanteti. "uṭṭhāya te paccuggamanaṃ katanti. "na kataṃ bhanteti. "tesaṃ parikkhāraggahaṇaṃ te āpucchitanti. "nāpucchitaṃ bhanteti. "vattaṃ vā pānīyaṃ vā āpucchitanti. "nāpucchitaṃ bhanteti. "āsanaṃ abhiharitvā pādasambāhanaṃ katanti. "na kataṃ bhanteti. "tissa mahallakabhikkhūnaṃ sabbametaṃ vattaṃ kattabbaṃ, etaṃ akarontena vihāramajjhe nisīdituṃ na vaṭṭati; taveva doso, ete bhikkhū khamāpehīti. "ete maṃ bhante akkosiṃsu, Nāhaṃ ete khamāpemīti. "tissa mā evaṃ kari: taveva doso, khamāpehi neti. "na khamāpemi bhanteti. Atha satthā "dubbaco esa bhanteti bhikkhūhi vutte, "na bhikkhave idāneva, pubbepesa dubbacoyevāti vatvā "idāni tāvassa bhante dubbacabhāvo amhehi ñāto, atīte kimakālīti vutte, "tenahi bhikkhave suṇāthāti vatvā atītaṃ āhari: