Tissattheravatthu.
4. Kālīyakkhiniyā uppattivatthu. (4)
"na hi verena verānīti imaṃ dhammadesanaṃ satthā jetavane viharanto aññataraṃ vañjhitthiṃ ārabbha kathesi.
Eko kira kuṭumbikaputto, pitari kālakate, khette ca ghare ca sabbakammāni attanāva karonto mātaraṃ paṭijaggi. Athassa mātā "kumārikaṃ te tāta ānessāmīti āha. "amma mā evaṃ vadetha, ahaṃ yāvajīvaṃ tumhe paṭijaggissāmīti. "tāta khette ca ghare ca kiccaṃ tvameva karosi, tena mayhaṃ cittasukhaṃ nāma na hoti, ānessāmi teti. So punappunaṃ paṭikkhipitvāpi tuṇhī ahosi. Sā ekaṃ kulaṃ gantuṃ gehā nikkhami. Atha naṃ putto "katarakulaṃ gacchathāti pucchitvā, "asukannāmāti vutte, tattha gamanaṃ paṭisedhetvā attano abhirucitaṃ kulaṃ ācikkhi. Sā tattha gantvā kumārikaṃ vāretvā divasaṃ vavaṭṭhapetvā taṃ ānetvā tassa ghare akāsi. Sā vañjhā ahosi. Atha naṃ mātā "putta tvaṃ attano ruciyā kumārikaṃ ānāpesi, sā idāni vañjhā Jātā; aputtakañca nāma kulaṃ vinassati, paveṇi na ghaṭiyati; tena aññaṃ te kumārikaṃ ānessāmīti, tena "alaṃ ammāti vuccamānāpi punappunaṃ kathesi. Vañjhitthī taṃ kathaṃ sutvā "puttā nāma mātāpitūnaṃ vacanaṃ atikkamituṃ na sakkonti, idāni aññaṃ vijāyiniṃ itthiṃ ānetvā maṃ dāsībhogena bhuñjissati, yannūnāhaṃ sayamevekaṃ kumārikaṃ āneyyanti cintetvā ekaṃ kulaṃ gantvā tassatthāya kumārikaṃ vāretvā "kinnāmetaṃ amma vadesīti tehi paṭikkhittā "ahaṃ vañjhā, aputtakaṃ kulaṃ vinassati, tumhākaṃ dhītā puttaṃ paṭilabhitvā kuṭumbassa sāminī bhavissati, detha taṃ mayhaṃ sāmikassāti yācitvā sampaṭicchāpetvā ānetvā sāmikassa ghare akāsi. Athassā etadahosi "sacāyaṃ puttaṃ vā dhītaraṃ vā labhissati, ayameva kuṭumbassa sāminī bhavissati, yathā dārakaṃ na labhati; tatheva naṃ kātuṃ vaṭṭatīti. Atha naṃ āha "yadā te kucchiyaṃ gabbho patiṭṭhāti; tadā me āroceyyāsīti. Sā "sādhūti paṭisutvā, gabbhe patiṭṭhite, tassā ārocesi. Tassā pana sāyeva niccaṃ yāgubhattaṃ deti. Athassā āhāreneva saddhiṃ gabbhapātanabhesajjaṃ adāsi. Gabbho pati. Dutiyampi gabbhe patiṭṭhite, tassā ārocesi. Itarāpi dutiyampi tatheva pātesi. Atha naṃ paṭivissakitthiyo pucchiṃsu "kacci te sapattī antarāyaṃ karotīti. Sā tamatthaṃ ārocetvā, "andhabāle kasmā evamakāsi? ayaṃ tava issariyabhayena gabbhapātanabhesajjaṃ yojetvā deti, tena te gabbho patati, mā puna Evamakāsīti vuttā, tatiyavāre na kathesi. Athassā itarā udaraṃ disvā "kasmā mayhaṃ gabbhassa patiṭṭhitabhāvaṃ na kathesīti vatvā, "tvaṃ maṃ ānetvā dve vāre gabbhaṃ pātesi, kimatthaṃ tuyhaṃ kathemīti vutte, "naṭṭhādānimhīti cintetvā, tassā pamādaṃ olokentī, pariṇate gabbhe, okāsaṃ labhitvā bhesajjaṃ yojetvā adāsi. Gabbho pariṇatattā patituṃ asakkonto tiriyaṃ nipajji. Tibbā kharā vedanā uppajji. Jīvitasaṃsayaṃ pāpuṇi. Sā "nāsitamhi tayā, tvameva maṃ ānetvā tayo dārake nāsesi; idāni sayaṃpi nassāmi, itodāni cutā yakkhinī hutvā tava dārake khādituṃ samatthā hutvā nibbatteyyanti patthanaṃ ṭhapetvā kālaṃ katvā tasmiṃyeva gehe majjārī hutvā nibbatti. Itaraṃpi sāmiko gahetvā "tayā me kulupacchedo katoti kapparajannukādīhi supothitaṃ pothesi. Sā tenevābādhena kālaṃ katvā tattheva kukkuṭī hutvā nibbatti.