Kosambiyaṃ hi ghositārāme pañcasatapañcasataparivārā dve bhikkhū vihariṃsu: vinayadharo ca dhammakathiko ca. Tesu dhammakathiko ekadivasaṃ sarīravalañjaṃ katvā udakakoṭṭhake ācamanaudakāvasesaṃ bhājane ṭhapetvā nikkhami. Pacchā vinayadharo tattha paviṭṭho taṃ udakaṃ disvā nikkhamitvā itaraṃ pucchi "āvuso tayā udakaṃ ṭhapitanti. "āma āvusoti. "kiṃ panettha āpattibhāvaṃ na jānāsīti. "āma na jānāmīti. "hotāvuso, ettha āpattīti. "tenahi Paṭikkarissāmi nanti "sace pana te āvuso asañcicca asatiyā kataṃ, natthi āpattīti. So tassā āpattiyā anāpattidiṭṭhi ahosi. Vinayadharopi attano nissitakānaṃ "ayaṃ dhammakathiko āpattiṃ āpajjamānopi na jānātīti ārocesi. Te tassa nissitake disvā "tumhākaṃ upajjhāyo āpattiṃ āpajjitvāpi āpattibhāvaṃ na jānātīti āhaṃsu. Te gantvā attano upajjhāyassa ārocesuṃ. So evamāha "ayaṃ vinayadharo pubbe "anāpattīti vatvā idāni `āpattīti vadati, musāvādī esoti. Te gantvā "tumhākaṃ upajjhāyo musāvādīti kathayiṃsu. Te evaṃ aññamaññaṃ kalahaṃ vaḍḍhayiṃsu. Tato vinayadharo okāsaṃ labhitvā dhammakathikassa āpattiyā adassane ukkhepanīyakammaṃ akāsi. Tato paṭṭhāya tesaṃ paccayadāyakā upaṭṭhākāpi dve koṭṭhāsā ahesuṃ. Ovādapaṭiggāhikā bhikkhuniyopi ārakkhadevatāpi tāsaṃ sandiṭṭhasambhattā ākāsaṭṭhadevatāpi yāva brahmalokāpi sabbe puthujjanā dve pakkhā ahesuṃ. Yāva akaniṭṭhabhavanā pana ekaninnādaṃ kolāhalaṃ agamāsi.
Atheko bhikkhu tathāgataṃ upasaṅkamitvā ukkhepakānaṃ "dhammikenevāyaṃ kammena ukkhittoti laddhiṃ ukkhittānuvattakānaṃ "adhammikena kammena ukkhittoti laddhiṃ ukkhepakehi vāriyamānānaṃpi ca tesaṃ taṃ anuparivāretvā vicaraṇabhāvaṃ ārocesi. Bhagavā "samaggā kira hontūti dve vāre pesetvā "na icchanti bhante samaggā bhavitunti sutvā tatiyavāre "bhinno bhikkhusaṅgho, bhinno bhikkhusaṅghoti sutvā tesaṃ santikaṃ Gantvā, ukkhepakānaṃ ukkhepane itaresañca āpattiyā adassane ādīnavaṃ kathetvā puna tesaṃ tattheva ekasīmāyaṃ uposathādīni anujānitvā bhattaggādīsu bhaṇḍanajātānaṃ "āsanantarikāya nisīditabbanti bhattagge vattaṃ paññāpetvā "idānipi bhaṇḍanajātā viharantīti sutvā tattha gantvā "alaṃ bhikkhave mā bhaṇḍanantiādīni vatvā "bhikkhave bhaṇḍanakalahaviggahavivādā nāmete anatthakārakā, kalahaṃ nissāya hi laṭukikāpi sakuṇikā hatthināgaṃ jīvitakkhayaṃ pāpesīti laṭukikajātakaṃ kathetvā "bhikkhave samaggā hotha mā vivadatha; vivādaṃ nissāya hi anekasahassavaṭṭakāpi jīvitakkhayaṃ pattāti vaṭṭakajātakaṃ kathesi.