Ekassa caritaṃ seyyo, natthi bāle sahāyatā;

eko care na ca pāpāni kayirā,

appossukko mātaṅgaraññeva nāgoti.

Gāthāpariyosāne pañcasatāpi te bhikkhū arahatte patiṭṭhahiṃsu. Ānandatthero anāthapiṇḍikādīhi pesitaṃ sāsanaṃ ārocetvā "bhante anāthapiṇḍikapamukhā pañca ariyasāvakakoṭiyo tumhākaṃ āgamanaṃ paccāsiṃsantīti āha. Satthā "tenahi gaṇhāhi pattacīvaranti pattacīvaraṃ gāhāpetvā nikkhami. Nāgo gantvā magge tiriyaṃ aṭṭhāsi. Bhikkhū taṃ disvā bhagavantaṃ pucchiṃsu "kiṃ karoti bhanteti. "tumhākaṃ bhikkhave bhikkhaṃ dātuṃ paccāsiṃsati, dīgharattaṃ kho panāyaṃ mayhaṃ upakārako, nāssa cittaṃ kopetuṃ vaṭṭati, nivattatha bhikkhaveti. Satthā bhikkhū gahetvā nivatti. Hatthīpi vanasaṇḍaṃ pavisitvā Panasakadaliphalādīni nānāphalāni saṃharitvā rāsiṃ katvā punadivase bhikkhūnaṃ adāsi. Pañcasatā bhikkhū sabbāni khepetuṃ nāsakkhiṃsu. Bhattakiccapariyosāne satthā pattacīvaraṃ gahetvā nikkhami. Nāgo bhikkhūnaṃ antarantarena gantvā satthu purato tiriyaṃ aṭṭhāsi. Bhikkhū taṃ disvā bhagavantaṃ pucchiṃsu "kiṃ karoti bhanteti. "ayaṃ bhikkhave tumhe pesetvā maṃ nivattetīti. "evaṃ bhanteti. "āma bhikkhaveti. Atha naṃ satthā "pārileyyaka idaṃ mama anivattagamanaṃ, tava iminā attabhāvena jhānaṃ vā vipassanaṃ vā maggaphalaṃ vā natthi, tiṭṭha tvanti āha. Taṃ sutvā nāgo mukhe soṇḍaṃ pakkhipitvā rodanto pacchato pacchato agamāsi. So hi satthāraṃ nivattetuṃ labhanto teneva niyāmena yāvajīvaṃ paṭijaggeyya. Satthā pana taṃ gāmūpacāraṃ patvā "pārileyyaka ito paṭṭhāya tava abhūmi, manussāvāso saparipantho, tiṭṭha tvanti āha. So rodamāno tattha ṭhatvā, satthari cakkhupathaṃ vijahante, hadayena phalitena kālaṃ katvā satthari pasādena tāvatiṃsabhavane tiṃsayojanike kanakavimāne accharāsahassamajjhe nibbatti. "pārileyyakadevaputtotvevassa nāmaṃ ahosi. Satthāpi anupubbena jetavanaṃ agamāsi.