Setabyanagaravāsino hi "cullakālo majjhimakālo mahākālo cāti tayo bhātaro kuṭumbikā. Tesu jeṭṭhakaniṭṭhā disāsu vicaritvā pañcahi sakaṭasatehi bhaṇḍaṃ āharanti. Majjhimakālo ābhataṃ vikkīṇāti. Athekasmiṃ samaye te ubhopi bhātaro pañcahi sakaṭasatehi nānābhaṇḍaṃ gahetvā sāvatthiṃ gantvā sāvatthiyā ca jetavanassa ca antare sakaṭāni mocayiṃsu. Tesu mahākālo sāyaṇhasamaye mālāgandhādihatthe sāvatthīvāsino ariyasāvake dhammassavanāya gacchante disvā "kuhiṃ ime gacchantīti pucchitvā tamatthaṃ sutvā "ahaṃpi gamissāmīti cintetvā kaniṭṭhaṃ āmantetvā "tāta sakaṭesu appamatto hohi, ahaṃpi dhammaṃ sotuṃ gamissāmīti vatvā gantvā tathāgataṃ vanditvā parisapariyante nisīdi. Satthā taṃdivasaṃ tassa ajjhāsayena anupubbīkathaṃ kathento dukkhakkhandhasuttādivasena anekapariyāyena kāmānaṃ ādīnavaṃ okāraṃ saṅkilesañca kathesi. Taṃ sutvā mahākālo "sabbaṃ kira pahāya gantabbaṃ, paralokaṃ gacchantaṃ neva bhogā na ñātayo anugacchanti, kiṃ me gharāvāsena, pabbajissāmīti cintetvā, mahājane vanditvā pakkante, satthāraṃ pabbajjaṃ yācitvā, satthārā "natthi te koci apaloketabboti vutte, "kaniṭṭho me atthi bhanteti vatvā, "tenahi apalokehi nanti vutte, "sādhu bhanteti āgantvā Kaniṭṭhaṃ etadavoca "tāta imaṃ sabbaṃ sāpateyyaṃ paṭipajjāti. "tumhe pana bhātikāti. "ahaṃ satthu santike pabbajissāmīti. So taṃ nānappakārehi yācitvā nivattetuṃ asakkonto "sādhu sāmi yathājjhāsayaṃ karothāti āha. Mahākālo gantvā satthu santike pabbaji. "ahaṃ bhātikaṃ gahetvāva uppabbajissāmīti cullakālopi pabbaji. Aparabhāge mahākālo upasampadaṃ labhitvā satthāraṃ upasaṅkamitvā sāsane dhurāni pucchitvā, satthārā dvīsu dhuresu kathitesu, "ahaṃ bhante mahallakakāle pabbajitattā ganthadhuraṃ pūretuṃ na sakkhissāmi, vipassanādhuraṃ pana pūressāmīti yāva arahattā sosānikadhutaṅgaṃ kathāpetvā, paṭhamayāmātikkame sabbesu niddaṃ okkantesu, susānaṃ gantvā paccūsakāle sabbesu anuṭṭhitesuyeva, vihāraṃ āgacchati.