uppajjitvā nirujjhanti tesaṃ vūpasamo sukhoti gāthaṃ vatvā vipassanaṃ vaḍḍhetvā saha paṭisambhidāhi arahattaṃ pāpuṇi.
Tasmiṃ arahattaṃ patte, satthā bhikkhusaṅghaparivuto cārikañcaramāno setabyanagaraṃ gantvā siṃsapāvanaṃ pāvisi. Cullakālassa bhariyāyo "satthā kira anuppattoti sutvā "amhākaṃ sāmikaṃ gaṇhissāmāti pesetvā satthāraṃ nimantāpesuṃ. Buddhānaṃ pana aparicitaṭṭhāne āsanapaññattiṃ ācikkhantena ekena bhikkhunā paṭhamataraṃ gantuṃ vaṭṭati. Buddhānaṃ hi majjhimaṭṭhāne āsanaṃ paññāpetvā tassa dakkhiṇato sārīputtattherassa vāmato mahāmoggallānattherassa tato paṭṭhāya ubhosu passesu bhikkhusaṅghassa āsanaṃ paññāpetabbaṃ hoti; tasmā mahākālatthero cīvarapārupanaṭṭhāne ṭhatvā "tvaṃ purato gantvā āsanapaññattiṃ ācikkhāhīti cullakālaṃ pesesi. Tassa diṭṭhakālato paṭṭhāya gehajanā tena saddhiṃ parihāsaṃ karontā nīcāsanāni saṅghattherakoṭiyaṃ attharanti, uccāsanāni saṅghanavakakoṭiyaṃ. Itaro "mā evaṃ karotha, uccāsanāni upari paññāpetha, nīcāsanāni heṭṭhāti āha. Itthiyo tassa vacanaṃ asaṇantiyo viya "tvaṃ kiṃ karonto vicarasi? kiṃ tava āsanāni paññāpetuṃ na vaṭṭati? tvaṃ kaṃ āpucchitvā pabbajito? kena pabbajāpitosi? kasmā idhāgatosīti vatvā nivāsanapārupanaṃ acchinditvā setakāni
Vatthāni nivāsetvā sīse mālācumbaṭakaṃ ṭhapetvā "gaccha tvaṃ, satthāraṃ ānehi; mayaṃ āsanāni paññāpessāmāti pahiṇiṃsu. So naciraṃ bhikkhubhāve ṭhatvā avassikova uppabbajitvā lajjituṃ na jānāti; tasmā tena ākappena nirāsaṅkova gantvā satthāraṃ vanditvā buddhappamukhaṃ bhikkhusaṅghaṃ ādāya āgato. Bhikkhusaṅghassa pana bhattakiccāvasāne mahākālassa bhariyāyo "imāhi attano sāmiko gahito, mayaṃpi amhākaṃ sāmikaṃ gaṇhissāmāti cintetvā punadivasatthāya satthāraṃ nimantayiṃsu. Tadā pana āsanapaññāpanatthaṃ añño bhikkhu agamāsi. Tā tasmiṃ khaṇe okāsaṃ alabhitvā buddhappamukhaṃ bhikkhusaṅghaṃ nisīdāpetvā bhikkhaṃ adaṃsu. Cullakālassa pana dve bhariyāyo, majjhimakālassa catasso, mahākālassa aṭṭha. Bhikkhūpi bhattakiccaṃ kātukāmā nisīditvā bhattakiccamakaṃsu, bahi gantukāmā uṭṭhāya agamaṃsu. Satthā pana nisīditvā bhattakiccaṃ kari. Tassa bhattakiccapariyosāne tā itthiyo "bhante mahākālo amhākaṃ anumodanaṃ katvā gamissati, tumhe purato gacchathāti vadiṃsu. Satthā "sādhūti vatvā purato agamāsi. Gāmadvāraṃ patvā bhikkhusaṅgho ujjhāyi "kinnāmetaṃ satthārā kataṃ, ñatvā nu kho kataṃ udāhu ajānitvā?, hiyyo cullakālassa purato gatattā pabbajjantarāyo jāto, ajja aññassa purato gatattā antarāyo nāhosi, idāni satthā mahākālaṃ nivattetvā āgato, sīlavā kho pana bhikkhu ācārasampanno; karissanti nu kho tassa pabbajjantarāyanti. Satthā tesaṃ vacanaṃ sutvā nivattitvā ṭhito "kiṃ kathetha bhikkhaveti pucchi. Te tamatthaṃ ārocesuṃ. "kiṃ pana tumhe bhikkhave cullakālaṃ viya mahākālaṃ sallakkhethāti. "āma bhante, tassa hi dve pajāpatiyo, imassa aṭṭha; aṭṭhahi parikkhipitvā gahito kiṃ karissati bhanteti. Satthā "mā bhikkhave evaṃ avacuttha, cullakālo uṭṭhāya samuṭṭhāya subhārammaṇabahulo viharati, papātataṭe ṭhitadubbalarukkhasadiso, mayhaṃ pana putto mahākālo asubhānupassī viharati, ghanaselapabbato viya acalo vāti vatvā imā gāthāyo abhāsi