7. Devadattavatthu. (7)
"anikkasāvoti imaṃ dhammadesanaṃ satthā jetavane viharanto rājagahe devadattassa gandhārakāsāvalābhaṃ ārabbha kathesi.
Ekasmiṃ hi samaye dve aggasāvakā pañcasate pañcasate attano parivāre ādāya satthāraṃ āpucchitvā jetavanato rājagahaṃ agamaṃsu. Rājagahavāsino dvepi tayopi bahūpi ekato hutvā āgantukadānaṃ adaṃsu. Athekadivasaṃ āyasmā sārīputto anumodanaṃ karonto "upāsakā eko sayaṃ dānaṃ deti, paraṃ na samādapeti; so nibbattanibbattaṭṭhāne bhogasampadaṃ labhati, no parivārasampadaṃ, eko paraṃ samādapeti, sayaṃ na deti; nibbattanibbattaṭṭhāne parivārasampadaṃ labhati, no bhogasampadaṃ, eko sayaṃpi na deti, paraṃpi na samādapeti; so nibbattanibbattaṭṭhāne kañjikamattaṃpi kucchipūraṃ na labhati, anātho hoti nippaccayo, eko sayaṃpi deti, paraṃpi samādapeti; so nibbattanibbattaṭṭhāne attabhāvasatepi attabhāvasahassepi attabhāvasatasahassepi bhogasampadañceva parivārasampadañca labhatīti evaṃ dhammaṃ desesi. Tameko paṇḍitapuriso sutvā "acchariyā vata bho dhammadesanā, sukhakāraṇaṃ kathitaṃ; mayā imāsaṃ dvinnaṃ sampattīnaṃ nipphādanakakammaṃ kātuṃ vaṭṭatīti cintetvā " bhante sve mayhaṃ bhikkhaṃ gaṇhathāti theraṃ nimantesi. "kittakehi te bhikkhūhi attho upāsakāti. "kittakā pana vo bhante parivārāti. "sahassamattā upāsakāti. "sabbehi saddhiṃyeva bhikkhaṃ gaṇhatha bhanteti. Thero adhivāsesi. Upāsako Nagaravīthiyaṃ caranto "ammatātā mayā bhikkhusahassaṃ nimantitaṃ, tumhe kittakānaṃ bhikkhūnaṃ bhikkhaṃ dātuṃ sakkhissatha, tumhe kittakānanti samādapeti. Manussā attano attano pahonakaniyāmena "mayaṃ dasannaṃ dassāma, mayaṃ vīsatiyā, mayaṃ satassāti āhaṃsu. Upāsako "tenahi ekasmiṃ ṭhāne samāgamaṃ katvā ekatova pacissāma, sabbe telatilataṇḍulasappiphāṇitādīni samāharathāti ekasmiṃ ṭhāne samāharāpesi. Athassa eko kuṭumbiko satasahassagghanakaṃ gandhārakāsāvavatthaṃ datvā "sace te dānavaṭṭaṃ nappahoti, idaṃ vissajjetvā, yadūnaṃ, taṃ pūreyyāsi; sace pahoti, yassa icchasi; tassa bhikkhuno dadeyyāsīti āha. Tadā tassa sabbaṃ dānavaṭṭaṃ pahosi, kiñci ūnannāma nāhosi. So manusse pucchi "idaṃ anagghakāsāvaṃ ekena kuṭumbikena evaṃ nāma vatvā dinnaṃ, dānavaṭṭaṃ atirekaṃ jātaṃ, kassidaṃ demāti. Ekacce "sārīputtattherassāti āhaṃsu. Ekacce "thero sassaparipākasamaye āgantvā gamanasīlo; devadatto amhākaṃ maṅgalāmaṅgalesu sahāyo udakamaṇiko viya niccaṃ patiṭṭhito, tassa taṃ demāti āhaṃsu. Sambahulikāya kathāyapi "devadattassa dātabbanti vattāro bahutarā ahesuṃ. Atha naṃ devadattassa adaṃsu. So taṃ chinditvā sibbitvā rajitvā nivāsetvā pārupitvā vicarati. Manussā taṃ disvā "nayidaṃ devadattassa anucchavikaṃ; sārīputtattherassa anucchavikaṃ; devadatto attano ananucchavikaṃ nivāsetvā pārupitvā vicaratīti vadiṃsu.