anuppanneyeva hi buddhe, rājagahato avidūre "upatissagāmo ca kolitagāmo cāti dve brāhmaṇagāmā ahesuṃ. Tesu upatissagāme sāriyā nāma brāhmaṇiyā gabbhassa patiṭṭhitadivaseyeva kolitagāme moggalliyā nāma brāhmaṇiyāpi gabbho patiṭṭhahi. Tāni kira dvepi kulāni yāva sattamā kulaparivaṭṭā ābaddha- paṭibaddhasahāyakāneva. Tāsaṃ dvinnaṃpi ekadivasameva gabbhaparihāraṃ adaṃsu. Tā ubhopi dasamāsaccayena putte vijāyiṃsu. Nāmaggahaṇadivase sāriyā brāhmaṇiyā puttassa upatissagāmake jeṭṭhakulassa puttattā "upatissoti nāmaṃ akaṃsu. Itarassa kolitagāme jeṭṭhakulassa puttattā "kolitoti nāmaṃ akaṃsu. Te ubhopi vuḍḍhimanvāya sabbasippānaṃ pāraṃ agamaṃsu. Upatissamāṇavassa kīḷanatthāya nadiṃ vā uyyānaṃ vā gamanakāle pañca suvaṇṇasivikāsatāni parivārāni honti, kolitamāṇavassa pañca ājaññarathasatāni. Dvepi janā pañcapañcamāṇavasataparivārā honti. Rājagahe ca anusaṃvacchare giraggasamajjo nāma hoti. Tesaṃ dvinnaṃpi ekaṭṭhāneyeva mañcātimañcaṃ bandhanti. Dvepi ekatova nisīditvā samajjaṃ passantā hasitabbaṭṭhāne hasanti, saṃvegaṭṭhāne saṃvegaṃ āpajjanti, Dāyaṃ dātuṃ yuttaṭṭhāne dāyaṃ denti. Tesaṃ iminā niyāmena ekadivasaṃ samajjaṃ passantānaṃ paripākagatattā ñāṇassa purimadivasesu viya hasitabbaṭṭhāne hāso vā saṃvegaṭṭhāne saṃvego vā dāyaṃ dātuṃ yuttaṭṭhāne dāyaṃ vā nāhosi. Dve pana janā evaṃ cintayiṃsu "kiṃ ettha oloketabbaṃ atthi, sabbepime appatte vassasate apaṇṇattikabhāvaṃ gamissanti, amhehi pana ekaṃ mokkhadhammaṃ pariyesituṃ vaṭṭatīti ārammaṇaṃ gahetvā nisīdiṃsu. Tato kolito upatissaṃ āha "samma upatissa tvaṃ na aññesu divasesu viya haṭṭhapahaṭṭho, idāni anattamanadhātukosi, kinte sallakkhitanti. So āha "samma kolita `etesaṃ olokane sāro natthi, niratthakametaṃ, attano mokkhadhammaṃ gavesituṃ vaṭṭatīti idaṃ cintayanto nisinnomhi, tvaṃ pana kasmā anattamanosīti. Sopi tathevāha. Athassa attanā saddhiṃ ekajjhāsayataṃ ñatvā upatisso āha "samma amhākaṃ ubhinnaṃpi sucintitaṃ, mokkhadhammaṃ pana gavesituṃ vaṭṭati, gavesantehi nāma ekaṃ pabbajjaṃ laddhuṃ vaṭṭati, kassa santike pabbajāmāti.