Tena kho pana samayena sañjayo paribbājako rājagahe paṭivasati mahatiyā paribbājakaparisāya saddhiṃ. Te "tassa santike pabbajissāmāti pañcamāṇavakasatāni "sivikāyo ca rathe ca gahetvā gacchathāti uyyojetvā pañcahi māṇavakasatehi saddhiṃ sañjayassa santike pabbajiṃsu. Tesaṃ pabbajitakālato paṭṭhāya Sañjayo atirekalābhaggayasaggappatto ahosi. Te katipāheneva sabbaṃ sañjayassa samayaṃ pariggaṇhitvā "ācariya tumhākaṃ jānanasamayo ettakova udāhu uttariṃpi atthīti pucchiṃsu. "ettakova, sabbaṃ tumhehi ñātanti vutte, te cintayiṃsu "evaṃ sati, imassa santike brahmacariyavāso niratthako, mayaṃ mokkhadhammaṃ gavesituṃ nikkhantā, so imassa santike uppādetuṃ na sakkā, mahā kho pana jambudīpo, gāmanigamajanapadarājadhāniyo carantā addhā mokkhadhammadesakaṃ kañci ācariyaṃ labhissāmāti. Tato paṭṭhāya "yattha yattha paṇḍitā samaṇabrāhmaṇā santīti vadanti; tattha tattha gantvā sākacchaṃ karonti. Tehi puṭṭhapañhaṃ aññe kathetuṃ na sakkonti, te pana tesaṃ pañhaṃ vissajjenti. Evaṃ sakalajambudīpaṃ pariggaṇhitvā nivattitvā sakaṭṭhānameva āgantvā "samma kolita amhesu yo paṭhamaṃ amataṃ adhigacchati, so ārocetūti katikaṃ akaṃsu.
Evaṃ tesu katikaṃ katvā viharantesu, satthā vuttānukkamena rājagahaṃ patvā veḷuvanaṃ paṭiggahetvā veḷuvane viharati. Tadā "caratha bhikkhave cārikaṃ bahujanahitāyāti ratanattayaguṇappakāsanatthaṃ uyyojitānaṃ ekasaṭṭhiyā arahantānaṃ antare pañcavaggiyānaṃ abbhantare assajitthero paṭinivattitvā rājagahaṃ āgato punadivase pātova pattacīvaramādāya rājagahaṃ piṇḍāya pāvisi. Tasmiṃ samaye upatissaparibbājako pātova bhattakiccaṃ katvā paribbājakārāmaṃ Gacchanto theraṃ disvā cintesi "mayā evarūpo nāma pabbajito na diṭṭhapubboyeva, ye loke arahanto vā arahattamaggaṃ vā samāpannā, ayaṃ tesaṃ bhikkhu aññataro; yannūnāhaṃ imaṃ bhikkhuṃ upasaṅkamitvā puccheyyaṃ `kaṃsi tvaṃ āvuso uddissa pabbajito, ko vā te satthā, kassa vā tvaṃ dhammaṃ rocesīti. Athassa etadahosi "akālo kho imaṃ bhikkhuṃ pañhaṃ pucchituṃ, antaragharaṃ paviṭṭho piṇḍāya carati; yannūnāhaṃ imaṃ bhikkhuṃ piṭṭhito piṭṭhito anubandheyyaṃ, atthikehi upañātaṃ magganti. So theraṃ laddhapiṇḍapātaṃ aññataraṃ okāsaṃ gacchantaṃ disvā nisīditukāmatañcassa ñatvā attano paribbājakapīṭhakaṃ paññāpetvā adāsi. Bhattakiccapariyosānepissa attano kuṇḍikāya udakaṃ adāsi. Evaṃ ācariyavattaṃ katvā katabhattakiccena therena saddhiṃ madhurapaṭisanthāraṃ katvā evamāha "vippasannāni kho te āvuso indriyāni, parisuddho chavivaṇṇo pariyodāto; kaṃsi tvaṃ āvuso uddissa pabbajito, ko vā te satthā, kassa vā tvaṃ dhammaṃ rocesīti pucchi. Thero cintesi "ime paribbājakā nāma sāsanassa paṭipakkhabhūtā, imassa sāsane gambhīrataṃ dassessāmīti attano navakabhāvaṃ dassento āha "ahaṃ kho āvuso navo acirapabbajito adhunāgato imaṃ dhammavinayaṃ, na tāva sakkhissāmi vitthārena dhammaṃ desetunti. Paribbājako "ahaṃ upatisso nāma, tvaṃ yathāsattiyā appaṃ vā bahuṃ vā vada, etaṃ nayasatena nayasahassena paṭivijjhituṃ mayhaṃ bhāroti vatvā āha