Gāthāpariyosāne kolito sotāpattiphale patiṭṭhahitvā āha "kuhiṃ kira samma amhākaṃ satthā vasatīti. "veḷuvane kira samma, evaṃ no ācariyena assajittherena kathitanti. "tenahi samma āyāma, satthāraṃ passissāmāti. Sārīputtatthero ca nāmesa sadāpi ācariyapūjako va; tasmā sahāyakaṃ evamāha "samma amhehi adhigataṃ amataṃ amhākaṃ ācariyassa sañjayaparibbājakassāpi kathessāma, bujjhamāno paṭivijjhissati, appaṭivijjhanto amhākaṃ saddahitvā satthu santikaṃ gamissati, buddhānaṃ desanaṃ sutvā maggaphalapaṭivedhaṃ karissatīti. Tato dvepi janā sañjayassa santikaṃ agamaṃsu. Sañjayo te disvā "kiṃ tātā koci vo amatamaggadesako laddhoti pucchi. "āma ācariya laddho; buddho loke uppanno, dhammo uppanno, saṅgho uppanno; tumhe tucche asāre vicaratha, etha, satthu santikaṃ gamissāmāti. "gacchatha tumhe, ahaṃ na sakkhissāmīti. "kiṃkāraṇāti. "ahaṃ mahājanassa ācariyo hutvā vicariṃ, tassa me antevāsikavāso cāṭiyā udakacalanabhāvuppattisadiso, na sakkhissāmahaṃ antevāsikavāsaṃ vasitunti. "mā evaṃ karittha ācariyāti. "hotu tātā, gacchatha tumhe, nāhaṃ sakkhissāmīti. "ācariya loke buddhassa uppannakālato paṭṭhāya mahājano gandhamālādihattho gantvā tameva pūjessati, mayaṃpi tattheva gamissāma, tumhe kiṃ karissathāti. "tātā kinnu kho imasmiṃ loke dandhā bahū, udāhu paṇḍitāti. "dandhā ācariya bahū, Paṇḍitā nāma katipayāeva hontīti. "tenahi tātā paṇḍitā paṇḍitā samaṇassa gotamassa santikaṃ gamissanti, dandhā dandhā mama santikaṃ āgamissanti; gacchatha tumhe, nāhaṃ gamissāmīti. Te "paññāyissatha tumhe ācariyāti pakkamiṃsu. Tesu gacchantesu, sañjayassa parisā bhijji. Tasmiṃ khaṇe ārāmo tuccho ahosi. So tucchaṃ ārāmaṃ disvā uṇahaṃ lohitaṃ chaḍḍesi. Tehipi saddhiṃ gacchantesu pañcasu paribbājakasatesu, sañjayassa parisāya aḍḍhateyyasatāni nivattiṃsu. Attano antevāsikehi aḍḍhateyyehi paribbājakasatehi saddhiṃ veḷuvanaṃ agamaṃsu.