Satthā catuparisamajjhe nisinno dhammaṃ desento te dūrato va disvā bhikkhū āmantesi "ete bhikkhave dve sahāyakā āgacchanti kolito ca upatisso ca, etaṃ me sāvakayugaṃ bhavissati aggaṃ bhaddayuganti. Te satthāraṃ vanditvā ekamantaṃ nisīdiṃsu. Te bhagavantaṃ etadavocuṃ "labheyyāma mayaṃ bhante bhagavato santike pabbajjaṃ; labheyyāma upasampadanti. "etha bhikkhavoti bhagavā avoca, "svākkhāto dhammo, caratha brahmacariyaṃ sammā dukkhassa antakiriyāyāti. Sabbepi iddhimayapattacīvaradharā vassasatikattherā viya ahesuṃ. Atha nesaṃ parisāya cariyāvasena satthā dhammadesanaṃ vaḍḍhesi. Ṭhapetvā dve aggasāvake avasesā arahattaṃ pāpuṇiṃsu. Aggasāvakānaṃ pana uparimaggakiccaṃ na niṭṭhāsi. Kiṃkāraṇā? Sāvakapāramīñāṇassa mahantatāya. Athāyasmā mahāmoggallāno Pabbajitadivasato sattame divase magadharaṭṭhe kallavālagāmakaṃ upanissāya viharanto, thīnamiddhe okkamante, satthārā saṃvejito thīnamiddhaṃ vinodetvā tathāgatena dinnaṃ dhātukammaṭṭhānaṃ suṇantova uparimaggattayakiccaṃ niṭṭhāpetvā sāvakapāramīñāṇassa matthakaṃ patto, sārīputtattheropi pabbajitadivasato aḍḍhamāsaṃ atikkamitvā satthārā saddhiṃ tameva rājagahaṃ upanissāya sūkarakhātaleṇe viharanto, attano bhāgineyyassa dīghanakhaparibbājakassa vedanāpariggahasuttante desiyamāne, suttānusārena ñāṇaṃ pesetvā parassa vaḍḍhitaṃ bhattaṃ bhuñjanto viya sāvakapāramīñāṇassa matthakaṃ patto. "nanu cāyasmā mahāpañño, atha kasmā mahāmoggallānato ciratarena sāvakapāramīñāṇaṃ pāpuṇīti. Parikammamahantatāya. Yathā hi duggatamanussā katthaci gantukāmā khippameva nikkhamanti, rājūnaṃ pana hatthivāhanakappanādiṃ mahantaṃ parikammaṃ laddhuṃ vaṭṭati; evaṃ sampadamidaṃ veditabbaṃ. Taṃdivasameva pana satthā vaḍḍhamānakacchāyāya veḷuvane sāvakasannipātaṃ katvā dvinnaṃ therānaṃ aggasāvakaṭṭhānaṃ datvā pāṭimokkhaṃ uddisi.
Bhikkhū ujjhāyiṃsu "satthā mukholokanena bhikkhūnaṃ deti, aggasāvakaṭṭhānaṃ dentena nāma paṭhamaṃ pabbajitānaṃ pañcavaggiyānaṃ dātuṃ vaṭṭati, ete anolokentena yasattherappamukhānaṃ pañcapaññāsāya bhikkhūnaṃ dātuṃ vaṭṭati, ete anolokentena bhaddavaggiyānaṃ, ete anolokentena uruvelakassapādīnaṃ tebhātikānaṃ; ete pana ettake Pahāya sabbapacchā pabbajitānaṃ aggasāvakaṭṭhānaṃ dentena mukhaṃ oloketvā dinnanti vadiṃsu. Satthā "kiṃ kathetha bhikkhaveti pucchitvā, "idaṃ nāmāti vutte, "nāhaṃ bhikkhave mukhaṃ oloketvā bhikkhūnaṃ demi, etesaṃ pana attanā attanā patthitapatthitameva demi; aññākoṇḍañño hi ekasmiṃ sasse nava aggasassadānāni dento na aggasāvakaṭṭhānaṃ patthetvā adāsi, aggadhammaṃ pana arahattaṃ sabbapaṭhamaṃ paṭivijjhituṃ patthetvā adāsīti. "kadā bhagavāti. "suṇissatha bhikkhaveti. "āma bhanteti.