"bhikkhave ito ekanavutikappe vipassī bhagavā loke udapādi. Tadā "mahākālo cullakāloti dve bhātikā kuṭumbikā mahantaṃ sālikkhettaṃ vapāpesuṃ. Athekadivasaṃ cullakālo sālikkhettaṃ gantvā ekaṃ sāligabbhaṃ phāletvā khādi. Atimadhuraṃ ahosi. So buddhappamukhassa saṅghassa sāligabbhadānaṃ dātukāmo hutvā jeṭṭhabhātikaṃ upasaṅkamitvā "bhātika sāligabbhaṃ phāletvā buddhānaṃ anucchavikaṃ katvā pacāpetvā dānaṃ demāti āha. "kiṃ vadesi, sāligabbhaṃ phāletvā dānaṃ nāma neva atīte bhūtapubbaṃ, nānāgate bhavissati, mā sassaṃ nāsayīti. So punappunaṃ yāciyeva. Atha naṃ bhātā "tenahi khettaṃ dve koṭṭhāse katvā mama koṭṭhāsaṃ anāmasitvā attano khettakoṭṭhāse, yaṃ icchasi, taṃ karohīti āha. So "sādhūti khettaṃ vibhajitvā bahū manusse hatthakammaṃ yācitvā sāligabbhaṃ

Phāletvā nirudake khīre pacāpetvā sappimadhusakkharāhi yojetvā buddhappamukhassa bhikkhusaṅghassa dānaṃ datvā bhattakiccapariyosāne "idaṃ bhante mama aggadānaṃ aggadhammassa sabbapaṭhamaṃ paṭivedhāya saṃvattatūti āha. Satthā "evaṃ hotūti anumodanaṃ akāsi. So khettaṃ gantvā olokento sakalakhette kaṇṇikābaddhehi viya sālisīsehi sañchannaṃ disvā pañcavidhaṃ pītiṃ paṭilabhitvā "lābhā vata meti cintetvā puthukakāle puthukaggaṃ nāma adāsi, gāmavāsīhi saddhiṃ aggasassadānaṃ nāma adāsi; lāyane lāyanaggaṃ, veṇikaraṇe veṇiggaṃ, kalāpādīsu kalāpaggaṃ khalaggaṃ bhaṇḍaggaṃ koṭṭhagganti evaṃ ekasasse nava vāre aggadānaṃ adāsi. Tassa sabbesu vāresu gahitagahitaṭṭhānaṃ paripūri. Sassaṃ atirekaṃ uṭṭhānasampannaṃ ahosi. Dhammo nāmesa attānaṃ rakkhantaṃ rakkhati.

Dhammo have rakkhati dhammacāriṃ

dhammo suciṇṇo sukhamāvahāti