A. 32/22. Uppajjanakassa gotamabuddhassa sāsane aggasāvakaṭṭhānaṃ patthitaṃ, tvaṃ dutiyasāvakaṭṭhānaṃ patthehīti. Evañca pana vatvā therehi puretarameva ekapassena gantvā sirivaḍḍhassa nivesanadvāre aṭṭhāsi. Sirivaḍḍho "cirassaṃ vata me ayyo āgatoti āsane nisīdāpetvā attanā nīcatare āsane nisinno "antevāsikaparisā pana vo bhante na paññāyantīti pucchi, "āma samma, amhākaṃ assamaṃ anomadassī buddho āgato, mayaṃ tassa attano balena sakkāraṃ karimhā, satthā sabbesaṃ dhammaṃ desesi, desanāpariyosāne ṭhapetvā maṃ sesā arahattaṃ pattā pabbajiṃsu, ahaṃ satthu aggasāvakaṃ nisabhattheraṃ disvā anāgate uppajjanakassa gotamabuddhassa nāma sāsane aggasāvakaṭṭhānaṃ patthesiṃ, tvaṃpi tassa sāsane dutiyasāvakaṭṭhānaṃ patthehīti. "mayhaṃ buddhehi saddhiṃ paricayo natthi bhanteti. "buddhehi saddhiṃ kathanaṃ mayhaṃ bhāro hotu, tvaṃ mahantaṃ abhisakkāraṃ sajjehīti. Sirivaḍḍho tassa vacanaṃ sutvā attano nivesanadvāre rājamānena aṭṭhakarīsamattaṃ ṭhānaṃ samatalaṃ kāretvā vālikaṃ okiritvā lājapañcamāni pupphāni vikkiritvā nīluppalacchadanaṃ maṇḍapaṃ kārāpetvā buddhāsanaṃ paññāpetvā sesabhikkhūnaṃpi āsanāni paṭiyādetvā mahantaṃ sakkārasammānaṃ sajjetvā buddhānaṃ nimantanatthāya saradatāpasassa saññaṃ adāsi. Tāpaso buddhappamukhaṃ bhikkhusaṅghaṃ gahetvā tassa nivesanaṃ agamāsi. Sirivaḍḍhopi paccuggamanaṃ katvā tathāgatassa hatthato pattaṃ gahetvā maṇḍapaṃ Pavesetvā paññattāsane nisinnassa buddhappamukhassa bhikkhusaṅghassa dakkhiṇodakaṃ datvā paṇītabhojanena parivisitvā bhattakiccapariyosāne buddhappamukhaṃ bhikkhusaṅghaṃ mahārahehi vatthehi acchādetvā "bhante nāyaṃ ārambho appamattakaṭṭhānatthāya, imināva niyāmena sattāhaṃ anukampaṃ karothāti āha. Satthā adhivāsesi. So teneva niyāmena sattāhaṃ mahādānaṃ pavattetvā bhagavantaṃ vanditvā añjaliṃ paggayha ṭhito āha "bhante mama sahāyo saradatāpaso `yassa satthu aggasāvako bhaveyyanti patthesi, ahaṃ tasseva dutiyasāvako bhaveyyanti. Satthā anāgataṃ oloketvā tassa patthanāya samijjhanabhāvaṃ disvā byākāsi "tvaṃpi ito kappasatasahassādhikaṃ asaṅkheyyaṃ atikkamitvā gotamabuddhassa dutiyasāvako bhavissasīti. Buddhānaṃ byākaraṇaṃ sutvā sirivaḍḍho haṭṭhapahaṭṭho ahosi. Satthāpi bhattānumodanaṃ katvā saparivāro vihārameva gato. Ayaṃ bhikkhave mama puttehi tadā patthitapatthanā, te yathāpatthitameva labhiṃsu, nāhaṃ mukhaṃ oloketvā demīti.