Aparabhāge satthari kosambiyaṃ viharante, sasāvakasaṅghassa tathāgatassa mahanto lābhasakkāro nibbatti. Tattha vatthabhesajjādihatthā manussā vihāraṃ pavisitvā "kuhiṃ satthā, kuhiṃ sārīputtatthero, kuhiṃ mahāmoggallānatthero, kuhiṃ mahākassapatthero, kuhiṃ bhaddiyatthero, kuhiṃ anuruddhatthero, kuhiṃ ānandatthero, kuhiṃ bhagutthero, kuhiṃ kimbilattheroti asītimahāsāvakānaṃ nisinnaṭṭhānaṃ olokentā vicaranti. "devadattatthero kuhiṃ nisinno vā ṭhito vāti pucchanto nāma natthi. So cintesi "ahaṃ etehi saddhiṃyeva pabbajito, etepi khattiyapabbajitā, ahaṃpi khattiyapabbajito; lābhasakkārahatthā manussā ete pariyesanti, mama nāmaṃ gahetāpi natthi, kena nu kho saddhiṃ ekato hutvā kaṃ pasādetvā mama lābhasakkāraṃ nibbatteyyanti. Athassa etadahosi "ayaṃ rājā bimbisāro paṭhamadassaneneva ekādasanahutehi saddhiṃ sotāpattiphale patiṭṭhito, na sakkā etena saddhiṃ ekato bhavituṃ, kosalaraññāpi saddhiṃ na sakkā ekato bhavituṃ, ayaṃ kho pana rañño putto ajātasattukumāro kassaci guṇadosaṃ na jānāti, etena saddhiṃ ekato bhavissāmīti. So kosambito rājagahaṃ gantvā kumārakavaṇṇaṃ abhinimminitvā cattāro āsīvise catūsu hatthapādesu ekaṃ gīvāya bandhitvā ekaṃ sīse cumbaṭakaṃ katvā ekaṃ ekaṃsaṃ karitvā imāya ahimekhalāya ākāsato oruyha ajātasattussa ucchaṅge nisīditvā, tena bhītena "kosi tvanti vutte, "ahaṃ devadattoti vatvā tassa Bhayavinodanatthaṃ taṃ attabhāvaṃ paṭisaṃharitvā saṅghāṭipattacīvaradharo purato ṭhatvā taṃ pasādetvā lābhasakkāraṃ nibbattesi. So lābhasakkārābhibhūto "ahaṃ bhikkhusaṅghaṃ pariharissāmīti pāpakaṃ cittaṃ uppādetvā saha cittuppādena iddhito parihāyitvā satthāraṃ veḷuvanavihāre sarājikāya parisāya dhammaṃ desentaṃ vanditvā uṭṭhāyāsanā añjalimpaggayha "bhagavā bhante etarahi jiṇṇo vuḍḍho mahallako, appossukko diṭṭhadhammasukhavihāraṃ anuyuñjatu; ahaṃ bhikkhusaṅghaṃ pariharissāmi, niyyādetha me bhikkhusaṅghanti vatvā satthārā kheḷāsikavādena apasādetvā paṭikkhitto, anattamano imaṃ paṭhamaṃ tathāgate āghātaṃ bandhitvā apakkami. Athassa bhagavā rājagahe pakāsanīyakammaṃ kāresi. So "pariccattodāni ahaṃ samaṇena gotamena, idānissa anatthaṃ karissāmīti ajātasattuṃ upasaṅkamitvā "pubbe kho kumāra manussā dīḍāyukā, etarahi appāyukā, ṭhānaṃ kho panetaṃ vijjati, yaṃ tvaṃ kumārova samāno kālaṃ kareyyāsi, tenahi tvaṃ kumāra pitaraṃ hantvā rājā hohi, ahaṃ bhagavantaṃ hantvā buddho bhavissāmīti vatvā, tasmiṃ rajje patiṭṭhite, tathāgatassa vadhāya purise payojetvā, tesu sotāpattiphalaṃ patvā nivattesu, sayaṃ gijjhakūṭaṃ abhiruhitvā "ahameva samaṇaṃ gotamaṃ jīvitā voropessāmīti silaṃ pavijjhitvā ruhiruppādakammaṃ katvā imināpi upāyena māretuṃ asakkonto puna nāḷāgiriṃ vissajjāpesi. Tasmiṃ āgacchante, ānandatthero attano jīvitaṃ satthu Pariccajitvā purato aṭṭhāsi. Satthā nāgaṃ dametvā nagarā nikkhamitvā vihāraṃ āgantvā anekasahassehi upāsakehi abhihaṭaṃ mahādānaṃ paribhuñjitvā, tasmiṃ divase sannipatitānaṃ aṭṭhārasakoṭisaṅkhātānaṃ rājagahavāsīnaṃ anupubbīkathaṃ kathesi. Caturāsītiyā pāṇasahassānaṃ dhammābhisamayo jāto. "aho mahāguṇo āyasmā ānando; tathārūpe nāma hatthināge āgacchante, attano jīvitaṃ pariccajitvā satthu purato aṭṭhāsīti therassa guṇakathaṃ sutvā "na bhikkhave idāneva, pubbepesa mamatthāya jīvitaṃ pariccajiyevāti vatvā bhikkhūhi yācito cullahaṃsamahāhaṃsakakkaṭakajātakāni kathesi.