13. Sumanādevīvatthu. (13)

"idha nandati, pecca nandatīti imaṃ dhammadesanaṃ satthā jetavane viharanto sumanādeviṃ ārabbha kathesi.

Sāvatthiyaṃ hi devasikaṃ anāthapiṇḍikassa gehe dve bhikkhusahassāni bhuñjanti, tathā visākhāya mahāupāsikāya. Sāvatthiyañca yo yo dānaṃ dātukāmo hoti; so so tesaṃ ubhinnaṃ okāsaṃ labhitvāva karoti. "kiṃkāraṇāti. "tumhākaṃ dānaggaṃ anāthapiṇḍiko vā visākhā vā āgatāti pucchitvā, "nāgatāti vutte, satasahassaṃ vissajjetvā katadānampi "kiṃ dānaṃ nāmetanti garahanti. Ubhopi hi te bhikkhusaṅghassa ruciñca anucchavikakiccāni ca jānanti. Tesu viharantesu, bhikkhū cittānurūpameva bhuñjanti. Tasmā sabbe dānaṃ dātukāmā te gahetvā gacchanti. Iti te attano ghare bhikkhū parivisituṃ na labhanti. Tato visākhā "ko nu kho mama ṭhāne ṭhatvā bhikkhusaṅghaṃ parivisissatīti upadhārentī puttassa dhītaraṃ disvā taṃ attano ṭhāne ṭhapesi. Sā tassā nivesane bhikkhusaṅghaṃ parivisati. Anāthapiṇḍikopi mahāsubhaddaṃ nāma jeṭṭhadhītaraṃ ṭhapesi. Sā hi bhikkhūnaṃ veyyāvaccaṃ karontī dhammaṃ suṇantī sotāpannā hutvā patikulaṃ agamāsi. Tato cullasubhaddaṃ ṭhapesi. Sāpi tatheva karontī sotāpannā hutvā patikulaṃ gatā. Atha sumanādeviṃ nāma kaniṭṭhadhītaraṃ ṭhapesi. Sā pana dhammaṃ sutvā sakadāgāmiphalaṃ patvā, kumārikāva hutvā tathārūpena aphāsukena āturā āhārupacchedaṃ katvā pitaraṃ Daṭṭhukāmā hutvā pakkosāpesi. So ekasmiṃ dānagge tassā sāsanaṃ sutvāva āgantvā "kiṃ amma sumaneti āha. Sā pitaraṃ āha "kiṃ kaniṭṭhabhātikāti. "vippalapasi ammāti. "na vippalapāmi kaniṭṭhabhātikāti. "bhāyasi ammāti. "na bhāyāmi kaniṭṭhabhātikāti. Ettakaṃ vatvāyeva pana sā kālamakāsi. So sotāpannopi samāno seṭṭhī dhītari uppannasokaṃ adhivāsetuṃ asakkonto dhītu sarīrakiccaṃ kāretvā rodanto satthu santikaṃ gantvā, "kiṃ gahapati dukkhī dummano assumukho rudamāno āgatosīti vutte, "dhītā me bhante sumanādevī kālakatāti āha. "atha kasmā socasi, nanu sabbesaṃ ekaṃsikaṃ maraṇanti. "jānāmetaṃ bhante, evarūpā pana me hirottappasampannā dhītā, sā maraṇakāle satiṃ paccupaṭṭhāpetuṃ asakkontī vippalapamānā matā: tena me anappakaṃ domanassaṃ uppajjatīti. "kiṃ pana tāya kathitaṃ mahāseṭṭhīti. "ahaṃ taṃ bhante `kiṃ amma sumaneti āmantesiṃ, atha maṃ āha `kiṃ kaniṭṭhabhātikāti; tato `vippalapasi ammāti vutte, `na vippalapāmi kaniṭṭhabhātikāti; `bhāyasi ammāti, `na bhāyāmi kaniṭṭhabhātikāti; ettakaṃ vatvā kālamakāsīti. Atha naṃ bhagavā āha "na hi te mahāseṭṭhi dhītā vippalapatīti. "atha kasmā evamāhāti. "kaniṭṭhattāyeva; dhītā hi te gahapati maggaphalehi tayā mahallikā; tvaṃ hi sotāpanno, dhītā pana te sakadāgāminī; sā maggaphalehi mahallikattā taṃ evamāhāti. "evaṃ bhanteti. "evaṃ gahapatīti. "idāni kuhiṃ nibbattā bhanteti. "tusitabhavane gahapatīti vutte, "bhante mama dhītā idha ñātakānaṃ antare nandamānā vicaritvā ito gantvāpi nandanaṭṭhāneyeva nibbattāti. Atha naṃ satthā "āma gahapati appamattā nāma gahaṭṭhā vā pabbajitā vā idhaloke ca paraloke ca nandantiyevāti vatvā imaṃ gāthamāha