Taṃ sutvā seṭṭhino "yaṃ kāremi, taṃ na hoti; yaṃ na kāremi, tadeva hotīti mahantaṃ domanassaṃ uppajji. puttasokena saddhiṃ so soko ekatova hutvā kucchiḍāhaṃ uppādetvā atisāraṃ janesi. Seṭṭhidhītāpi "sace koci seṭṭhino santikā āgacchati, tumhe mama akathetvā seṭṭhiputtassa paṭhamataraṃ mā kathayitthāti jane āṇāpesi. Seṭṭhīpi kho "nadāni taṃ duṭṭhaputtaṃ mama sāpateyyassa sāmikaṃ karissāmīti cintetvā ekaṃ āyuttakaṃ āha "mātula puttaṃ me daṭṭhukāmomhi, ekaṃ pādamūlikaṃ pesetvā mama puttaṃ pakkosāpehīti. So "sādhūti paṇṇaṃ datvā ekaṃ purisaṃ pesesi. Seṭṭhidhītāpi tassāgantvā dvāre ṭhitabhāvaṃ sutvā taṃ pakkosāpetvā "kiṃ tātāti pucchi. "seṭṭhī gilāno puttaṃ passituṃ pakkosāpeti ayyeti. "tāta seṭṭhī balavā dubbaloti. "balavā tāva āhāraṃ bhuñjatiyeva ayyeti. Sā seṭṭhiputtaṃ ajānāpetvāva tassa nivāsañca paribbayañca

Dāpetvā "mayā pesitakāle gamissasi, accha tāvāti āha. Mahāseṭṭhī puna āyuttakaṃ avoca "kiṃ mātula na te mama puttassa santikaṃ pahitanti. "pahitaṃ sāmi, gatapuriso na tāva etīti. "tenahi puna aparaṃ pesehīti. So pesesi. Seṭṭhidhītā tasmiṃpi tatheva paṭipajji. Atha seṭṭhino rogo balavā jāto, ekaṃ bhājanaṃ pavisati, ekaṃ nikkhamati. Puna seṭṭhī āyuttakaṃ pucchi "kiṃ mātula na te mama puttassa santikaṃ pahitanti. "pahitaṃ sāmi, gatapuriso pana na etīti. "tenahi puna aparaṃ pesehīti. So pesesi. Seṭṭhidhītā tatiyavāre āgataṃpi taṃ pavattiṃ pucchi. So "bāḷhagilāno ayye seṭṭhī āhāraṃ pacchinditvā maccuparāyano jāto; ekaṃ bhājanaṃ nikkhamati, ekaṃ pavisatīti āha. Seṭṭhidhītā cintesi "idāni gantuṃ kāloti seṭṭhiputtassa "pitā kira te gilānoti ārocetvā, "kiṃ vadasi bhaddeti vutte; "aphāsukamassa sāmīti āha. "idāni kiṃ kātabbanti. "sāmi gāmasatato uṭṭhānakaṃ paṇṇākāraṃ ādāya gantvā passissāma nanti āha. So "sādhūti paṇṇākāraṃ āharāpetvā sakaṭehi ādāya pakkāmi. Atha naṃ sā "pitā te dubbalo, ettakaṃ paṇṇākāraṃ gahetvā gacchantānaṃ papañco bhavissati, etaṃ nivattehīti vatvā taṃ sabbaṃ attano kulagehaṃ pesetvā puna āha "sāmi tvaṃ attano pitu pādapasse tiṭṭheyyāsi, ahaṃ ussīsakapasse ṭhassāmīti, gehaṃ pavisamānāyeva "gehassa purato ca pacchato ca ārakkhaṃ gaṇhathāti