Icchitaṃ patthitaṃ tuyhaṃ khippameva samijjhatu;

sabbe pūrentu saṅkappā, maṇi jotiraso yathāti anumodanaṃ akāsi. Paccekabuddhānaṃ kira imāva dve gāthā anumodanagāthā nāma honti. Tattha maṇi jotirasoti: sabbakāmadadaṃ maṇiratanaṃ vuccati. Idantassa pubbacaritaṃ. so etarahi caṇḍapajjoto ahosi. Tassa ca kammassa nissandena imāni pañca vāhanāni nibbattiṃsu.

Athekadivasaṃ rājā uyyānakīḷāya nikkhami. Udeno "ajja palāyitabbanti mahantamahante cammapasibbake hiraññasuvaṇṇassa pūretvā kareṇukapiṭṭhe ṭhapetvā vāsuladattaṃ ādāya palāyi.

Antepurapālakā palāyantaṃ disvā gantvā rañño ārocesuṃ. Rājā "sīghaṃ gacchathāti balaṃ pahiṇi. Udeno balassa pakkhantabhāvaṃ ñatvā kahāpaṇapasibbakaṃ mocetvā pātesi. Manussā kahāpaṇe uccinitvā puna pakkhandiṃsu. Itaro suvaṇṇapasibbakaṃ mocetvā pātetvā, tesaṃ suvaṇṇalobhena papañcantānaññeva, bahi nivutthaṃ attano khandhāvāraṃ pāpuṇi. Atha naṃ āgacchantaṃ disvāva attano balakāyo parivāretvā nagaraṃ pavesesi. So gantvāva vāsuladattaṃ abhisiñcitvā aggamahesiṭṭhāne ṭhapesi.