Dhammaṃ suṇitvā amhākaṃ kathehīti vadiṃsu. Sā tathā karontī aparabhāge tipiṭakadharā jātā. Atha naṃ satthā "etadaggaṃ bhikkhave mama sāvikānaṃ upāsikānaṃ dhammakathikānaṃ [1]- yadidaṃ khujjuttarāti etadagge ṭhapesi. Tāpi kho pañcasatā itthiyo taṃ evamāhaṃsu "amma satthāraṃ passitukāmamha, taṃ no dassehi, gandhamālādīhi naṃ pūjessāmāti. "ayye rājakulaṃ nāma bhāriyaṃ, tumhe gahetvā bahi gantuṃ na sakkāti. "amma mā no nāsehi, dasseheva amhākaṃ satthāranti. "tenahi tumhākaṃ vasanagabbhānaṃ bhittīsu, yattakena oloketuṃ sakkā hoti, tattakaṃ chiddaṃ katvā gandhamālādīni āharāpetvā satthāraṃ tiṇṇaṃ seṭṭhīnaṃ gharadvāraṃ gacchantaṃ tumhe tesu tesu ṭhānesu ṭhatvā oloketha ceva hatthe pasāretvā vandatha ca pūjetha cāti. Tā tathā katvā satthāraṃ gacchantañceva āgacchantañca oloketvā vandiṃsu ceva pūjesuṃ ca.

Athekadivasaṃ māgandiyā attano pāsādatalato nikkhamitvā caṅkamamānā tāsaṃ vasanaṭṭhānaṃ gantvā gabbhesu chiddaṃ disvā "idaṃ kinti pucchitvā, tāhi tassā satthari bandhāghātaṃ ajānantīhi "satthā imaṃ nagaraṃ āgato, mayaṃ ettha ṭhatvā satthāraṃ vandāma ceva pūjema cāti vutte, "āgato nāma imaṃ nagaraṃ samaṇo gotamo, idānissa kattabbaṃ jānissāmi, imāpi tassa upaṭṭhāyikā, imāsaṃpi kattabbaṃ jānissāmīti cintetvā gantvā rañño ārocesi "mahārāja sāmāvatīmissakānaṃ pañcasatānaṃ itthīnaṃ bahiddhā patthanā

Atthi, katipāheneva te jīvitaṃ na bhavissatīti. rājā "na tā evarūpaṃ karissantīti na saddahi, puna vuttepi, na saddahiyeva. Atha naṃ, evaṃ tikkhattuṃ vuttepi, asaddahantaṃ "sace me na saddahasi, tāsaṃ vasanaṭṭhānaṃ gantvā upadhārehi mahārājāti āha. Rājā gantvā gabbhesu chiddaṃ disvā "idaṃ kinti pucchitvā, tasmiṃ atthe ārocite, tāsaṃ akujjhitvā kiñci avatvāva chiddāni pidahāpetvā sabbagabbhesu khuddacchiddakavātapānāni kāresi. Khuddacchiddakavātapānāni kira tasmiṃ kāle uppannāni.