Māgandiyā satthāraṃ akkosāpetvā palāpetuṃ asakkontī "kinnu kho karissāmīti cintetvā "imā etassa upatthambhabhūtā, etāsaṃ byasanaṃ karissāmīti ekadivasaṃ rañño surāpānaṭṭhāne upaṭṭhānaṃ karontī cūḷapitu sāsanaṃ pahiṇi "attho me kira kukkuṭehi, Aṭṭha matakukkuṭe aṭṭha sajīvakukkuṭe gahetvā āgacchatu, āgantvā ca pana sopāṇamatthake ṭhatvā āgatabhāvaṃ nivedetvā, `pavisatūti vuttepi, apavisitvā paṭhamaṃ aṭṭha sajīvakukkuṭe pahiṇatu, pacchā itareti, cūḷupaṭṭhākassa ca "mama vacanaṃ kareyyāsīti lañcaṃ adāsi. Māgandiyo āgantvā rañño nivedāpetvā, "pavisatūti vutte, "rañño āpānabhūmiṃ na pavisissāmīti āha. Itarā cūḷupaṭṭhākaṃ pahiṇi "gaccha tāta mama cūḷapitu santikanti. So gantvā tena dinne aṭṭha sajīvakukkuṭe ānetvā "deva purohitena paṇṇākāro pahitoti āha. Rājā "bhaddako vata no uttaribhaṅgo uppanno, ko nu kho paceyyāti āha. Māgandiyā "mahārāja sāmāvatīpamukhā pañcasatā itthiyo nikkammā vicaranti, tāsaṃ pesehi, tā pacitvā āharissantīti āha. Rājā "gaccha tāsaṃ datvā, aññassa kira hatthe adatvā sayameva māretvā pacantūti pesesi. Cūḷupaṭṭhāko "sādhu devāti gantvā tathā vatvā tāhi "mayaṃ pāṇātipātaṃ na karomāti paṭikkhitto āgantvā tamatthaṃ rañño ārocesi. Māgandiyā "diṭṭhaṃ te mahārāja, idāni tāsaṃ pāṇātipātassa karaṇaṃ vā akaraṇaṃ vā jānissasi, `samaṇassa gotamassa pacitvā pesentūti vadehi devāti āha. Rājā tathā vatvā pesesi. Itaro gahetvā gacchanto viya hutvā gantvā te kukkuṭe purohitassa datvā matakukkuṭe gahetvā tāsaṃ santikaṃ netvā "ime kira kukkuṭe pacitvā satthu santikaṃ pahiṇathāti āha. "āhara sāmi, Idannāma amhākaṃ kiccanti paccuggantvā gaṇhiṃsu. So rañño santikaṃ āgantvā "kiṃ tātāti puṭṭho "samaṇassa gotamassa pacitvā pesethāti vuttamatteyeva, paṭimaggaṃ āgantvā gaṇhiṃsūti ācikkhi. Māgandiyā "passa mahārāja, na tā tumhādisānaṃ karonti; `bahiddhā patthanā tāsaṃ atthīti vutte, na saddahasīti āha. Rājā taṃ sutvāpi adhivāsetvā tuṇhīyeva ahosi. Māgandiyā "kinnu kho karissāmīti cintesi.