sāmāvati maṃ tāyassu, tvañca me saraṇaṃ bhavāti.

Atha naṃ sā purimanayeneva puna paṭikkhipitvā, "tenahi tañca saraṇaṃ gacchāmi satthārañca, varañca te dammīti vutte, "varo gahito hotu mahārājāti āha. So satthāraṃ upasaṅkamitvā saraṇaṃ gantvā nimantetvā bhikkhusaṅghassa sattāhaṃ dānaṃ datvā sāmāvatiṃ āmantetvā "uṭṭhehi varaṃ gaṇhāhīti āha. "mahārāja mayhaṃ hiraññādīhi attho natthi, idaṃ pana me varaṃ dehi: tathā karohi, yathā satthā nibaddhaṃ pañcahi bhikkhusatehi saddhiṃ idhāgacchati; dhammaṃ suṇissāmāti. Rājā satthāraṃ vanditvā "bhante pañcahi bhikkhusatehi saddhiṃ nibaddhaṃ idhāgacchatha, sāmāvatīmissakā `dhammaṃ suṇissāmāti vadantīti āha. "mahārāja buddhānaṃ nāma ekasmiṃ ṭhāne nibaddhaṃ gantuṃ na vaṭṭati; mahājano paccāsiṃsatīti. "tenahi bhante ekaṃ bhikkhuṃ āṇāpethāti. Satthā ānandattheraṃ āṇāpesi. So tato paṭṭhāya pañca bhikkhusatāni ādāya nibaddhaṃ rājakulaṃ gacchati. Tāpi deviyo nibaddhaṃ theraṃ saparivāraṃ bhojenti dhammaṃ suṇanti.

Tā ekadivasaṃ therassa dhammakathaṃ sutvā pasīditvā pañcahi uttarāsaṅgasatehi dhammapūjaṃ akaṃsu. Ekeko uttarāsaṅgo pañcasatāni agghati. Tāsaṃ ekaṃ vatthaṃpi adisvā rājā pucchi "kuhiṃ uttarāsaṅgāti. "ayyassa no dinnāti. "tena sabbe gahitāti. "āma gahitāti. Rājā theraṃ upasaṅkamitvā tāhi uttarāsaṅgānaṃ dinnabhāvaṃ pucchitvā tāhi dinnabhāvañca therena gahitabhāvañca sutvā "nanu bhante atibahūni

Vatthāni, ettakehi kiṃ karissathāti pucchi. "amhākaṃ pahonakāni gaṇhitvā sesāni jiṇṇacīvarakānaṃ dassāmi mahārājāti. "te attano purāṇacīvarāni kiṃ karissantīti. "jiṇṇataracīvarakānaṃ dassantīti. "te attano jiṇṇacīvarāni kiṃ karissantīti. "paccattharaṇāni karissantīti. "purāṇapaccattharaṇāni kiṃ karissantīti. "bhummattharaṇāni karissantīti. "purāṇabhummattharaṇāni kiṃ karissantīti. "pādapuñchanāni karissanti mahārājāti. "purāṇapādapuñchanāni kiṃ karissantīti. "khaṇḍākhaṇḍikaṃ koṭṭetvā mattikāya madditvā bhittiṃ vilimpissantīti. "bhante ettakaṃ katvāpi ayyānaṃ dinnāni na nassantīti. "āma mahārājāti. Rājā pasanno aparāni pañca vatthasatāni āharāpetvā therassa pādamūle ṭhapāpesi. Thero kira pañcasagghanikāni vatthāni pañcasatabhāgena pādamūle ṭhapetvā dinnāni pañcasatakkhattuṃ labhi, sahassagghanikāni vatthāni sahassabhāgena pādamūle ṭhapetvā dinnāni sahassakkhattuṃ labhi, satasahassagghanikāni vatthāni satasahassabhāgena pādamūle ṭhapetvā dinnāni satasahassakkhattuṃ labhi. "ekaṃ dve tīṇi cattāri pañca dasātiādinā nayena laddhānaṃ pana gaṇanā nāma natthi. Tathāgate kira parinibbute, thero sakalajambudīpaṃ vicaritvā sabbavihāresu bhikkhūnaṃ attano santakāneva pattacīvarāni adāsi.